សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ករណីគ្រោះថ្នាក់ចរាចរណ៍មួយបានកើតឡើងរវាងរថយន្តនិងម៉ូតូ ព្រោះតែការបើកបរខ្វះការប្រុងប្រយ័ត្នរៀងៗខ្លួន ខណៈដែលបុរសម្នាក់ជិះម៉ូតូធុនធំមួយគ្រឿងម៉ាកSL បើកក្នុងល្បឿនលឿន ជ្រុលទៅបុករថយន្តមួយគ្រឿងដែលទើបនិងបើកចេញពីយានដ្ឋានជួសជុលរថយន្តដោយបញ្ច្រាសទិសដៅចរាចរណ៍ បណ្តាលឲ្យរងការខូចខាតទាំងសងខាង ។
ហេតុការណ៍គ្រោះថ្នាក់ចរាចរនេះ បានកើតឡើងកាលពីវេលាម៉ោង៧យប់ថ្ងៃចន្ទ ១២កើត ខែផល្គុន ឆ្នាំរកា នព្វស័ក ព.ស២៥៦១ ត្រូវនឹង ថ្ងៃទី២៦ ខែកុម្ភ: ឆ្នាំ២០១៨ នៅ ចំណុចខាងមុខយានដ្ឋានជួសជុលរថយន្តយីហោ នាគវ័ន តាមបណ្តោយផ្លូវលេខ១៣២ ជាប់និងរបងវត្តនាគវ័នផ្នែកខាងកើត ស្ថិតក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
តាមប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុគេឃើញបុរសជិះម៉ូតូមួយគ្រឿងម៉ាកSL ពណ៌ទឹកប្រាក់ ពាក់ស្លាកលេខ ភ្នំពេញ 1AQ-9701 ដោយធ្វើដំណើរតាមបណ្តោយផ្លូវលេខ១៣២ ក្នុងទិសដៅពីត្បូងទៅជើង និងក្នុងល្បឿនលឿន ។ លុះជិះមកដល់ចំណុចកើតហេតុក៏បានវ៉ាក់អីជាមួយរថយន្តមួយគ្រឿងទៀតម៉ាក តូយ៉ូតាព្រូស ពណ៌ស ពាក់ស្លាកលេខ ភ្នំពេញ 2AO-4089 ដែលបើកបរដោយបុរសម្នាក់ ចេញពីក្នុងយន្តដ្ឋានជួសជុលរថយន្តខាងលើ ដោយបើកបញ្ច្រាសទិសដៅចរាចរណ៍ ទើបបង្កឲ្យម៉ូតូជ្រុលបុករថយន្តចំខាងមុខពេញទំហឹងតែម្តង ។ ចំណែកម៉ូតូនិងរថយន្តរងការខូចខាតបន្តិចបន្តួច ។
ក្រោយពេលកើតហេតុភាគីទាំង២បានប្រកែកយកត្រូវរាងៗខ្លួន តែដោយភាគីខាងម៉ូតូមិនចង់មានរឿងវែងឆ្ងាយក៏ព្រមចេញសំណងចំនួន១៥០ដុល្លារឲ្យទៅភាគីខាងរថយន្តដើម្បីបញ្ចប់រឿងតែម្តង ៕ស តារា
