សម្តេចតេជោ ហ៊ុន សែន អញ្ជើញសម្ពោធសមិទ្ធផលនៅវត្តឈូកវ៉ា ខណ្ឌព្រែកព្នៅ រាជធានីភ្នំពេញ

នៅថ្ងៃនេះ សម្តេចតេជោ ហ៊ុន សែន នាយករដ្ឋមន្ត្រី សប្បាយរីករាយ និងមានមោទនភាពជាខ្លាំងចំពោះ សមិទ្ធផលនៃព្រះពុទ្ធសាសនានៅក្នុងវត្តឈូកវ៉ានាពេលនេះ។ សម្តេចតេជោ ហ៊ុន សែន បានបញ្ជាក់អំពីប្រវត្តិនៃ “វត្តឈូកវ៉ា” នេះក៏មិនខុសពីបណ្តាវត្តអារាមនានាដទៃទៀតដេរ គឺសុទ្ធតែទទួលរងនូវការបំផ្លាញខ្ទិចខ្ទាំក្នុងរបបប្រល័យពូជសាសន៍ប៉ុលពត។ សមិទ្ធផលក្នុងទីអារាមនេះពិតជាស័ក្តិសមទៅនឹងការខិតខំប្រឹងប្រែងរបស់យើងទាំងអស់គ្នាក្នុងការបម្រើវិស័យព្រះពុទ្ធសាសនាសព្វថ្ងៃ។ ទីអារាមពិតជាមានសារៈសំខាន់ណាស់សម្រាប់ការគង់នៅរបស់ព្រះសង្ឈ យាយជី តាជី និងជាពិសេសសម្រាប់ការស្នាក់នៅរបស់សិស្ស និស្សិតក្រីក្រក្នុងការបន្តការសិក្សា។ ជាក់ស្តែងដូចជារូប សម្តេចតេជោ ផ្ទាល់ក៏លោកធ្លាប់បានផ្សារភ្ជាប់ជីវិតកាលពីយុវវ័យទៅនឹងទីវត្តអារាមតាំងពីក្មេងមកម្ល៉េះ។ ព្រះរាជាណាចក្រកម្ពុជា បានអនុវត្តន៍នូវបាវចនា “ជាតិ, សាសនា, ព្រះមហាក្សត្រ” ដែលជាផ្នែកមួយយ៉ាងសំខាន់ក្នុងការគោរពប្រតិបត្តិដែលមានចែងច្បាស់នៅក្នុងរដ្ឋធម្មនុញ។ ព្រះពុទ្ធសាសនាតែងតែធ្វើការប្រៀនប្រដៅមនុស្សឲ្យធ្វើនូវអំពើល្អ ហើយអំពើល្អ រមែងតែងតែទទួលបាននូវសេចក្តីសុខ។

នាឱកាសនេះផងដែរ ក្រៅពីការសម្ពោធសមិទ្ធផលនៅក្នុងទីអារាមនេះ សម្តេចតេជោ នាយករដ្ឋមន្ត្រីក៏បានផ្តល់ជាចំណងដៃនូវអគារសិក្សាថ្មីដល់ “អនុវិទ្យល័យជាស៊ីមឈូកវ៉ា” គឺអគារសិក្សា ១ខ្នង កម្ពស់ ៣ជាន់ មាន ៣០បន្ទប់រួមទាំងមានជាបណ្ណាល័យ សាលសហសិក្សា ទីធ្លា និងកន្លែងហាត់កីឡារបស់សិស្សានុសិស្សផងដែរ។

ចំពោះស្ថានភាពនយោបាយវិញ នៅថ្ងៃនេះ សម្តេចតេជោ ហ៊ុន សែន បានមានប្រសាសន៍បញ្ជាក់ថាមានអតីតមេដឹកនាំបក្សប្រឆាំងមួយចំនួនដែលត្រូវបានកាត់សិទ្ធិធ្វើនយោបាយ បានសរសេរលិខិតមកសម្តេច ដើម្បីសុំការអនុគ្រោះក្នុងការទទួលបានសិទ្ធិធ្វើនយោបាយឡើងវិញ។ ជារការឆ្លើយតប សម្តេចតេជោ ហ៊ុន សែន បានមានប្រសាសន៍ថា អ្នកត្រូវបានកាត់សិទ្ធិធ្វើនយោបាយមិនទាន់មានច្បាប់ណាដើម្បីលើកលែងនោះទេ គឺផ្ទុយពីអ្នកជាប់ទោសដែលមានច្បាប់អនុញ្ញាតឲ្យនាយករដ្ឋមន្រ្តីសុំលើកលែងទោស ក្រោយសាលក្រមចូលជាស្ថាពររួចហើយ។ ជាមួយគ្នានោះដែរ សម្តេចតេជោនាយករដ្ឋមន្រ្តី បានបន្ថែមថាការដុតរូប សម្តេច របស់ខ្មែរនៅអូស្ត្រាលី គឺជាមូលហេតុមួយក្នុងចំណោមមូលហេតុជាច្រើនទៀត ដែលសម្តេច មិនអាចជួបចរចាជាមួយអតីតមេដឹកនាំបក្សប្រឆាំងបាន។

នាឱកាសនោះ សម្តេចតេជោ ហ៊ុន សែន នាយករដ្ឋមន្ត្រី ក៏បានអញ្ជើញផ្តល់កិត្តិយសបំពាក់ គ្រឿងឥស្សរិយយសដល់សប្បុរសជនមួយចំនួនដែលបានចូលរួមចំណែកក្នុងការកសាងសមិទ្ធផលនានាក្នុងទីធ្លាវត្តអារាមនេះ។ បន្ទាប់មកសម្តេចតេជោ ហ៊ុន សែន បានអញ្ជើញកាត់ខ្សែបូរសម្ពោធឧបដ្ឋានសាលា និងសមិទ្ធផលនានាក្នុង វត្តឈូកវ៉ា ក្នុងបរិយាកាសសប្បាយរីករាយក្រៃលែង៕

រូបភាព៖ ហ្វេសប៊ុកសម្តេចតេជោ