សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ដោយអនុវត្តតាមបទបញ្ជាភ្លាមៗរបស់លោក ម៉ូវ ម៉ានិត អភិបាលខណ្ឌសែនសុខ នៅព្រឹកថ្ងៃទី០៨ ខែមីនា ឆ្នាំ២០១៨ រដ្ឋបាលខណ្ឌសែនសុខបានសហការជាមួយក្រុមហ៊ុនសុិនទ្រីចាត់មន្រ្តីជំនាញចុះពិនិត្យ និងដាក់គ្រឿងចក្រឈូសកៀរកើបសម្អាតលុបបំបាត់ទីតាំងដេប៉ូសំរាមមួយកន្លែង ស្ថិតនៅផ្លូវបេតុង ទល់នឹងផ្លូវ៩២ (ជិតផ្លូវផ្សារ ទំនើប AEON MALL 2 ) ភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ ដែលប្រជាពលរដ្ឋនាំគ្នាយកសំរាមបោះចោលជាបន្តបន្ទាប់យ៉ាងអនាធិបតេយ្យ ធ្វើឲ្យប៉ះពាល់សណ្តាប់ធ្នាប់ អនាម័យ និងបរិស្ថានយ៉ាងធ្ងន់ធ្ងរ ។
លោក អ៊ុក សុភា ប្រធានការិយាល័យអន្តរវិស័យខណ្ឌសែនសុខបានឲ្យដឹងថា ៖ កន្លងមក អាជ្ញាធរខណ្ឌបានសហការជាមួយក្រុមហ៊ុនសុិនទ្រី ធ្វើការលុបបំបាត់ដេប៉ូចោលសំរាមជាបន្តបន្ទាប់បានប្រមាណ ១២ទីតាំង នៅលើបណ្តោយផ្លូវសំខាន់ៗប្រមាណ ១០ខ្សែក្នុងភូមិសាស្រ្តខណ្ឌសែនសុខរបស់យើង ។ ជាក់ស្តែង ថ្ងៃនេះ ដើម្បីសុខមាលភាពរបស់ប្រជាពលរដ្ឋ និងរៀបចំសណ្តាប់ធ្នាប់សាធារណៈឲ្យមានរបៀបរៀបរយ អនាម័យ និងសោភ័ណ្ឌភាពក្នុងរាជធានីភ្នំពេញ អាជ្ញាធរខណ្ឌបានបន្តលុបំបាត់ទីតាំងចោលសំរាមដ៏ធំនៅតាមបណ្តោយផ្លូវបេតុងជិតការដ្ឋានផ្សារទំនើបអុីអន ទី២ ព្រោះជាតំបន់ទីប្រជុំជនកំពុងអភិវឌ្ឍន៍ និងមានប្រជាពលរដ្ឋធ្វើចរាចរណ៍ឆ្លងកាត់ទៅមកច្រើនជារៀងរាល់ថ្ងៃ ។
លោកបានបន្តថា ៖ បន្ទាប់ពីអាជ្ញាធរខណ្ឌបានលុបបំបាត់ទីតាំងសំរាមនេះរួចរាល់ ក៏បានដាក់ដាំស្លាកហាមចាក់សំរាម និងដាក់កម្លាំងឃ្លាំមើលចាប់ឃាត់ប្រជាពលរដ្ឋណាមិនអនុវត្តតាមបម្រាមរបស់អាជ្ញាធរ និងផាកពិន័យជាទឹកប្រាក់ឲ្យរាងចាលចាប់ពីចំនួន ៤០.០០០រៀល ដល់ ៤០០.០០០រៀល តាមប្រភេទសំរាមដែលបោះចោល ដោយចេញវិក្កយបត្រជូនត្រឹមត្រូវ ។
ជាមួយនេះ អាជ្ញាធរខណ្ឌសែនសុខសូមអំពាវដល់បងប្អូនប្រជាពលរដ្ឋរស់នៅក្នុងមូលដ្ឋានខណ្ឌទាំងអស់ មេត្តាចូលរួមសហការជាមួយអាជ្ញាធរក្នុងការថែរក្សាសណ្តាប់ធ្នាប់ អនាម័យ និងបរិស្ថានឲ្យបានល្អស្អាត ដើម្បីសុខមាលភាពរបស់បងប្អូនប្រជាពលរដ្ឋ ក៏ដូចជាសោភ័ណ្ឌ ភាពក្នុងរាជធានីភ្នំពេញរបស់យើង ៕ សុខ ខេមរា
