មាស សុខសោភា ថាដល់ពេលដែលនាងត្រូវប្រឡូកក្នុងវិស័យភាពយន្ត

ភ្នំពេញ៖ ប្រឡូកក្នុងអាជីពចម្រៀងជាច្រើនឆ្នាំ តារាលំដាប់ជួរមុខក្នុងផលិតកម្មថោន កញ្ញា មាស សុខសោភា បានធ្វើឲ្យអ្នកគាំទ្រសរសើរមិនដាច់ពីមាត់ ព្រោះតែទេពកោសល្យនៃការសម្តែងក្នុងបទចម្រៀងរបស់នាងកាន់តែប្រសើរ រហូតនាងបានទាំងចេញដឹកនាំការថតមួយចំនួនផងដែរ ។ តារាស្រីរូបនេះក៏ទម្លាយដែរថា ពេលនេះនាង ក៏ដល់ពេលដែលត្រូវប្រឡូកក្នុងអាជីពសម្តែងភាពយន្តផងដែរ ។

មាស សុខសោភា លើកឡើងថា នាងកំពុងតែពិចារណា ក្នុងការចេញថតភាពយន្តភាគ ឬភាពយន្តខ្នាតធំជាលើកដំបូង ក្នុងអាជីពសិល្បៈ។ ការថ្លែងនេះ ធ្វើឡើងក្រោយពីតារារូបនេះ កាន់តែមានជំនាញ ក្នុងការសម្តែងជាសាច់រឿង ។ បទចម្រៀងខ្លីៗ ជាខ្សែរឿង កាន់តែច្រើន បានជំរុញឲ្យសមត្ថភាពសម្តែងរបស់ មាស សុខសោភា កាន់តែវិវឌ្ឍន៍ ដែលនាងអាចសម្តែងបានស្ទើរគ្រប់ចរិកលក្ខណៈរបស់តួទាំងកម្សត់ ទន់ភ្លន់ និងកាច ឈ្នានីស។ នាងទទួលស្គាល់ថា មានផលិតកម្មជាច្រើនកំពុងតែទាក់ទងឲ្យនាងចូលរួមសម្តែង ប៉ុន្តែនាងនៅមិនទាន់សម្រេចចិត្តទទួលយកការសម្តែងភាពយន្តណាមួយឲ្យប្រាកដនៅឡើយទេ ។

នាងលើកឡើងថា អ្នកគ្រប់គ្រង និងចាត់ការទូទៅរបស់នាង កំពុងពិនិត្យមើលថា តើរឿងណា ដែលស័ក្តិសមនឹងនាង អាចចូលរួមសម្តែងនៅពេលខាងមុខ ។ នាងបញ្ជាក់ដែរថា ពេលនេះ នាង ក៏ចង់សម្រាកពីការងារសិល្បៈមួយរយៈពេលខ្លី ព្រោះតែការងារច្រើន ក៏ធ្វើឲ្យនាងនឿយហត់ដែរ ប៉ុន្តែនាងប្រាកដចិត្តថា នឹងទទួលយកការសម្តែងណាមួយ ដែលស័ក្តិសមសម្រាប់នាងយកមកសម្តែង ព្រោះតែមានភាពយន្តល្អៗជាច្រើនកំពុងស្ថិតក្នុងការជជែកគ្នានោះ ។ តារាស្រីរូបនេះ រំពឹងដែរថា ស្នាដៃសម្តែងភាពយន្តរបស់នាងលើកដំបូង ក្នុងជីវិតសិល្បៈ នឹងលេចរូបរាងក្នុងពេលដ៏ខ្លីខាងមុខនេះ ហើយនឹងទទួលបានការគាំទ្រច្រើនពីទស្សនិកជន ។

តារាស្រីរូបនេះ លើកឡើងដែរថា នាងអាចទទួលការថតគ្រប់ផលិតកម្មបានដោយមិនមានបញ្ហា គឺមិនមែនថតបានតែសម្រាប់ផលិតកម្ម ឬទូរទស្សន៍Townនោះទេ ។

នាងថា បច្ចុប្បន្នក៏មានអ្នកចម្រៀងជាច្រើនបានចាប់ផ្តើមប្រឡូកក្នុងអាជីពជាអ្នកសម្តែង ហើយនាង ក៏មានក្តីរំពឹងខ្ពស់ថា នាងអាចសម្តែងបានផងដែរ ។ គ្រាប់ពេជ្រប្រចាំផលិតកម្មTownរូបនេះ លើកឡើងថា បច្ចុប្បន្ន វិស័យភាពយន្តមានការរីកចម្រើនគួរសម ដែលគ្រប់ផ្នែកទាំងផលិតករ អ្នកបច្ចេកទេស គឺមានជំនាញខ្ពស់ ដែលមិនពិបាកនឹងការផលិតភាពយន្តប្រកបដោយគុណភាពនោះទេ សំខាន់គឺទុនវិនិយោគ ៕ វឌ្ឍនា