សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ លោកលោក លឹម សៀងហេង អនុប្រធានក្រុមការងារចុះជួយ សង្កាត់ព្រៃអង្គុញ និងជាប្រធានក្រុមការងារថ្នាក់ពង្រឹងភូមិកំពោតជ្រូកបានថ្លែងថា សូមបងប្អូនប្រជាពលរដ្ឋទាំងអស់ត្រូវរួមគ្នាចូលរួមថែរក្សាសុខសន្តិភាព ទោះក្នុងកាលទេសណាក៏ដោយ និងមិនត្រូវជឿតាមការញុះញង់របស់គណបក្សប្រឆាំង ឬពួកអគតិមួយចំនួន ដែលចូល ចិត្តបំភ្លៃការពិត ខណៈដែលប្រទេសជាតិកំពុងមានការអភិវឌ្ឍលើគ្រប់វិស័យ ។
ការថ្លែងបែបនេះរបស់លោក លឹម សៀងហេង បានធ្វើឡើងកាលពីរសៀល ថ្ងៃសៅរ៍ ១៥កើត ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៣១ ខែមីនា ឆ្នាំ២០១៨ ក្នុងពិធីជួបសំណេះសំណាលជាមួយប្រធាន អនុប្រធានក្រុមគណបក្សប្រជាជនភូមិកំពោតជ្រូក សង្កាត់ព្រៃអង្គុញ ក្រុងបាវិត។
លោក លឹម សៀងហេង ក៏បានផ្តាំផ្ញើ សាកសួរសុខទុក្ខពីសំណាក់លោកជ័យសុនប្រធានក្រុមការងារចុះជួយ សង្កាត់ព្រៃអង្គុញតែងតែមានមនោសញ្ចេតនា ស្រលាញ់រាប់អាន និងរួមសុខទុក្ខជាមួយបងប្អូនទាំងអស់ និងជួយដោះស្រាយ ទុក្ខលំបាកសព្វ បែបយ៉ាង ផងដែរ។
លោកក៏បានបញ្ជាក់ទៀតថា ក្រោយថ្ងៃរំដោះ ៧មករា ឆ្នាំ១៩៧៩ គឺក្រោមការអនុវត្តនូវគោលនយោបាយ ឈ្នះ ឈ្នះ របស់សម្តេចតេជោ ហ៊ុន សែន ដែលដាក់ចេញនូវវិធាន ការជាច្រើន ក្នុងកិច្ចធ្វើឲ្យប្រសើរឡើង នូវមនុស្ស ផ្លូវ ទឹក ភ្លើង ហើយវិស័យអាណាចក្រ វិស័យពុទ្ធចក្រក៏បានរស់ឡើងវិញនិងដើរទន្ទឹមគ្នា ហើយពិសេសយើងទាំងអស់គ្នាក៏មានសិទ្ធិ និងសេរីភាពគ្រប់បែប យ៉ាងផងដែរ ។
មិនតែប៉ុណ្ណោះយើងបានកសាងប្រទេសជាតិពីបាតដៃទទេ ដោយខិតខំស្តារកសាងឡើងវិញ នូវហេដ្ឋារចនាសម្ព័ន្ធរូបវ័ន្តដូចជា ផ្លូវថ្នល់ ស្ពាន ទំនប់ ប្រឡាយ សាលារៀន មន្ទីរពេទ្យ និង ព្រះវិហារ រហូតទទួលបាននូវការអភិវឌ្ឍគ្រប់វិស័យ ដូចដែលយើងទាំងអស់គ្នា បានឃើញមាននាពេលសព្វថ្ងៃនេះដោយ មិនមែនជារឿងចៃដន្យទេ គឺកើតឡើងដោយការដឹកនាំយ៉ាងត្រឹមត្រូវខាងនយោបាយ ប្រកបដោយភាពឈ្លាសវៃបំផុតរបស់សម្តេចតេជោ ទើបកម្ពុជាយើងមានអ្វីៗគ្រប់យ៉ាងនាពេលនេះ។
ក្នុងឪកាសនោះដែរលោក លឹម សៀងហេង ក៏បានជំរុញដល់អាជ្ញាធរមូលដ្ឋានត្រូវ បន្តខិតខំបន្ថែមទៀត ក្នុងការការពារសន្ដិសុខ សណ្ដាប់ធ្នាប់ សង្គមរបៀបរៀបរយសាធារណៈ អនុវត្ដន៍ឲ្យបាននូវគោលនយោបាយ របស់រាជរដ្ឋាភិបាល ស្តីពី ភូមិ-ឃុំ មានសុវត្ថិភាព បន្ដជំរុញកសាង ហេដ្ឋារចនាសម្ព័ន្ធរូបវ័ន្ដ ខិតខំដោះស្រាយ ឲ្យបានល្អនូវបាតុភាពផ្សេងៗ ក្នុងមូលដ្ឋានឲ្យកាន់តែប្រសើរឡើងផងដែរ ៕ យឹម សុថាន
