សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ នៅវេលាម៉ោង១៨និង១០នាទី ថ្ងៃចន្ទ ២រោច ខែចេត្រ ឆ្នាំ រកា នព្វស័ក ព.ស. ២៥៦១ ត្រូវនឹងថ្ងៃទី២ ខែមេសា ឆ្នាំ២០១៨ ចន្លោះគីឡូម៉ែត្រ១២៩ លេខ១៣០ ស្ថិតក្នុងភូមិវាល ឃុំកំពង់សិលា ស្រុកកំពង់សីលា ខេត្តព្រះសីហនុ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្ត នឹងម៉ូតូមានទិសដៅស្របគ្នា (ភ្នំពេញ.ព្រះសីហនុ) បើតាមអ្នកឃើញហេតុការណ៍បានប្រាប់ថា មុនពេលកើតហេតុ គេឃើញម៉ូតូបានបត់ចូលផ្ទះកាត់ពីមុខរថយន្ត ធ្វើឲ្យរថយន្តហ្វាងមិនទាន់ក៏បុកតែម្តង។
រថយន្តម៉ាក់Tacoma ពណ៌ទឹកប្រាក់ លេខភ្នំពេញ 2AM5375 បើកបរដោយឈ្មោះ រិន គឹមស្រ៊ុន ភេទប្រុស អាយុ៣៥ឆ្នាំ មានទីលំនៅភូមិ៤ សង្កាត់៤ ក្រុង/ខេត្តព្រះសីហនុ ត្រូវបានឃាត់ខ្លួនយកមកអធិការដ្ឋាននគរបាលស្រុកកំពង់សីលា ។ ម៉ូតូម៉ាក MSX ពណ៌ខ្មៅ លេខ ភ្នំពេញ 1DQ8319 ជិះគ្នា២នាក់បើកបរដោយឈ្មោះ ណន ប៉ាយយ៉ា ភេទប្រុស អាយុ១៨ឆ្នាំ មានទីលំនៅភូមិ ឃុំកើតហេតុខាងលើ រងរបួសមធ្យម និងអ្នករួមដំណើរឈ្មោះ ថុន គីមួយ ភេទស្រី អាយុ១៤ឆ្នាំ មានទីលំនៅភូមិឃុំកើតហេតុដូចគ្នា រងរបួសធ្ងន់ ត្រូវបានបញ្ជូនមកមណ្ឌលសុខភាពតក្កវិទកំពង់សីលា ដើម្បីជួយសង្គ្រោះ ។
បច្ចុប្បន្នរថយន្តនិងម៉ូតូខាងលើត្រូវបានយកមករក្សាទុកនៅអធិការដ្ឋាននគរបាលស្រុកកំពង់សីលារង់ចាំដោះស្រាយនៅពេលក្រោយ ៕ ឆ្លាម សមុទ្រ
