ខណ្ឌរដ្ឋបាលព្រៃឈើបាននាំកម្លាំងចុះចាប់គ្រឿងចក្រអត់ច្បាស់បញ្ជូនទៅតុលាការ តែម្ចាស់គ្រឿងចក្រថា មានច្បាប់ពីមន្ទីរបរិស្ថាន ក្នុងករណីជីកកកាយភ្នំនៅខាងក្រោយវត្តព្រំ

ចែករំលែក៖

ខេត្តប៉ៃលិន៖ បើតាមប្រជាពលរដ្ឋបាននិយាយតម៉ាត់គ្នាថា ប៉ុន្មានថ្ងៃនេះមានគ្រឿងចក្រកាយដីយ៉ាងគគ្រឹកគគ្រេងណាស់ នៅជាប់ព្រំដែនកម្ពុជា ថៃ ធ្វើឲ្យមានឈ្មួញមួយចំនួនបានរត់ការសុំច្បាប់ជីកកាយដីភ្នំយកធ្វើជាកម្មសិទ្ធិ និងយកអាចម៌ដីចាក់បំពេញទំនាប ឬអូរ ដើម្បីយកដីលក់ និងមានមន្ត្រីធំៗបានចូលដៃចូលជើងព្រោះបានសើមម៉ាត់សើមកដែរ ។

តាមសេចក្តីរាយការណ៍ពីមន្ត្រីជំនាញរដ្ឋបាលព្រៃឈើឲ្យដឹងថា ខណ្ឌរដ្ឋបាលព្រៃឈើប៉ៃលិនបានចុះចាប់គ្រឿងចក្រ ដឹកនាំពីលោក មិន រ៉ាវុធ នាយផ្នែករដ្ឋបាលព្រៃឈើខេត្តប៉ៃលិន បានដឹកនាំកម្លាំង ចុះចាប់ឃាត់គ្រឿងចក្រ និងរថយន្តដឹកដីជាច្រើនគ្រឿង ខណៈជីកកកាយដីមាន២កន្លែង គឺ១កន្លែង នៅខាងក្រោយសាលារៀនអត់មានច្បាប់ត្រឹមត្រូវ និង១កន្លែងទៀតនៅលើភ្នំសារវ៉ាន់កំពុងជីកកកាយធ្វើកន្លែងស្តុបទឹករបស់ក្រុមហ៊ុនទឹកស្អាត១ នៅស្រុកសាលាក្រៅ ដែលកន្លែងទាំងពីរនេះ ខាងប្រធានមន្ទីរបរិស្ថានអះអាងថា មានច្បាប់ ។

ហេតុការណ៍នេះ បានកើតឡើងនៅ វេលាម៉ោង៣និង៣០នាទីរសៀលថ្ងៃទី៣១ ខែឧស ភា ឆ្នាំ២០១៨ ស្ថិតនៅខាងក្រោយអនុវិទ្យាល័យផ្សារព្រំ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ រហូតដល់ព្រឹកថ្ងៃសុក្រ ៣រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១ ខែមិថុនា ឆ្នាំ២០១៨ មន្ត្រីខណ្ឌរដ្ឋបាលព្រៃឈើ កំពុងសាកសួរទៅលើម្ចាស់គ្រឿងចក្រ និងអ្នកបើកបររថយន្តនៅក្នុងខណ្ឌរដ្ឋបាលព្រៃឈើ ។

ប្រភពព័ត៌មានពីសំដីលោក មិន រ៉ាវុធ នាយផ្នែករដ្ឋបាលព្រៃឈើប៉ៃលិន បានឲ្យដឹងថា ក្រោយទទួលបានដំណឹងថា មានគ្រឿងចក្រអេស្កាវ៉ាទ័រ និងរថយន្តដឹកដីជាច្រើនគ្រឿង កំពុងធ្វើសកម្មភាពជីកកកាយដីនៅខាងក្រោយសាលារៀន អត់មានច្បាប់ ទើបខាងលោកបានសុំគោលការណ៍ពីព្រះរាជអាជ្ញាខេត្តប៉ៃលិន ចុះចាប់ឃាត់តែម្តង ។

លោកបន្តទៀតថា អត់ឃើញមានគ្រឿងចក្រខាងលើជីកកកាយដីយកទៅធ្វើសាលានោះទេ ដោយមិនដឹងជាដឹកយកទៅណាឡើយ ហើយរហូតមកដល់វេលាព្រឹកថ្ងៃទី០១ ខែមិថុនា ឆ្នាំ២០១៨ មានមន្ត្រីធំក្នុងខេត្តគេមកសម្រួល និងលោកគឹមសុខាប្រធានមន្ទីរបរិស្ថានមកដល់ការិយាល័យលោកផងដែរ តែខាងលោកកំពុងរៀបចំកសាងសំណុំរឿង ដើម្បីបញ្ជូនទៅអយ្យការអមសាលាដំបូងខេត្តប៉ៃលិន ឲ្យចាត់ការតាមនីតិវិធី ។

បើតាមប្រភពព័ត៌មានពីមេការគ្រឿងចក្រខាងលើ ឈ្មោះ លីន បានឲ្យដឹងថា ខាងលោកបានសុំទៅខាងប្រធានមន្ទីរបរិស្ថាន ខាងមេភូមិផ្សារព្រំ និងនាយកសាលារួចរាល់អស់ហើយ ដើម្បីជីកកកាយដីយកទៅចាក់ផ្លូវចូលសាលារៀន និងពង្រាបដីក្រោយសាលាឲ្យស្មើ តាមសំណូមពររបស់លោកនាយកអនុវិទ្យាល័យ ក្នុងការបង្កើតកន្លែងលេងកីឡា របស់សិស្សានុសិស្ស ។ លោកបន្តទៀតថា តែមិនដឹងជាយ៉ាងណាបានជា គេចុះទៅចាប់ឃាត់គ្រឿងចក្រ និងរថយន្តទាំងអស់ព្រមទាំងចាប់អ្នកបើកបរចំនួន៧នាក់យកទៅធ្វើកំណត់ហេតុនៅខណ្ឌរដ្ឋបាលព្រៃឈើប៉ៃលិនទៅវិញ ។

បើតាមសំដី លោក តង់ ធារ៉ា ប្រធានមន្ទីរអប់រំយុវជន និងកីឡា ខេត្តប៉ៃលិន បានឲ្យដឹងថា គ្រឿងចក្រខាងលើជីកកកាយដីភ្នំក្បែរសាលារៀនមែន ដើម្បីយកមកចាក់លប់ជង្ហុកនៅក្នុងបរិវេណសាលារៀន ហើយគោលបំណងសំខាន់ គឺរៀបចំធ្វើទីលានហាត់កីឡា សម្រាប់សិស្សរៀននៅក្នុងសាលាខាងលើតែម្តង ហើយកក៏អត់បានជីកដីលក់នោះដែរ បើនាយកសាលាណាហ៊ានធ្វើដូចការលើកឡើងខាងលើ លោកនឹងដកនាយកសាលានោះចេញភ្លាមតែម្តង ៕ ស សារ៉េត