សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសជនជាតិចិនម្នាក់បានរងរបួសបែកក្បាលបាក់ដៃសន្លប់ក្នុងថ្លុកឈាម ខណៈ ដែលជួបករណីគ្រោះថ្នាក់ចរាចរណ៍ជិះម៉ូតូល្បឿនលឿនមិនប្រកាន់ស្ដាំទៅបុក និងរថយន្តម៉ាកស្ប៉តមួយគ្រឿងបើកបញ្ច្រាសទិសគ្នាយ៉ាងពេញទំហឹងលាន់សូរដូចរន្ទះ បង្កការភ្ញាក់ផ្អើលទាំងកណ្ដាលយប់ ដល់អ្នកភូមិកំពុងដេកលង់លក់ចេញមកមើល និងរាយការណ៍មកសមត្ថកិច្ចមូលដ្ឋាន ។
ហេតុការណ៍នេះបានកើតឡើងកាលពីថ្ងៃអង្គារ ៧កើត ខែបឋមាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៩ ខែមិថុនា ឆ្នាំ២០១៨ វេលាម៉ោង១និង៤០នាទីរំលងអធ្រាត្រ នៅលើផ្លូវជាតិលេខ១ចន្លោះគីឡូម៉ែត្រលេខ១៦៥-១៦៦ ស្ថិតក្នុងភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង ។
យោងតាមសមត្ថកិច្ចនគរបាលក្រុងបាវិតបានឲ្យកាសែតនគរវត្តដឹងថា បុរសជនជាតិចិន ដែលរងរបួសធ្ងន់មិនទាន់ស្គាល់ឈ្មោះនោះទេ ដោយមានអាយុប្រមាណ៤០ឆ្នាំ ជិះម៉ូតូម៉ាកនូវោ ពណ៌ខៀវ អត់ស្លាកលេខ ខូចខាតយ៉ាងដំណំ ។
ចំណែករថយន្តម្ខាងទៀត ម៉ាកស្ប៉ត ពណ៌ខ្មៅ ស្លាកលេខ ភ្នំពេញ2R7581បើកបរដោយឈ្មោះ ជឿម ញ៉ាន ភេទប្រុស អាយុ២៨ឆ្នាំ មានទីលំនៅភូមិគោក ឃុំតាសោម ស្រុកអង្គរជុំ ខេត្តសៀមរាប ក្រោយកើតហេតុ បានរត់គេចខ្លួនភ្លាមៗបន្សល់រថយន្តនៅកន្លែងកើតហេតុ ។
តាមសាក្សីបានឲ្យដឹងថា មុនកើតហេតុ មានម៉ូតូ១គ្រឿងម៉ាកនូវោ ពណ៌ខៀវគ្មានស្លាកបើកបរដោយបុរសម្នាក់ ដែលធ្វើដំណើរពីកើតទៅលិចលើកំណាត់ផ្លូវជាតិលេខ១ក្នុងល្បឿនលឿនមិនប្រកាន់ស្ដាំ ស្រាប់តែទៅបុកប៉ះ រថយន្តម៉ាកស្ប៉តមួយគ្រឿង ដែលបើកបញ្ច្រាសគ្នាយ៉ាងពេញទំហឹង បណ្ដាលឲ្យបុរសជិះម៉ូតូរងរបួសបែកក្បាលបាក់ដៃខាងឆ្វេងរងរបួសធ្ងន់ ។
ក្រោយមក អ្នកបើករថយន្តដោយឃើញសភាពការណ៍មិនស្រួល ក៏បើកទ្វាររត់គេចបាត់ពីកន្លែងកើតហេតុភ្លាមៗ ។
បច្ចុប្បន្ន អ្នករងរបួសធ្ងន់ជនជាតិចិនត្រូវបានសមត្ថកិច្ចបញ្ជូនទៅព្យាបាលមន្ទីរពេទ្យ ខេត្តស្វាយរៀង ព្រមទាំងវាស់វែង និងអូសយកមធ្យោបាយទាំង២គ្រឿង មករក្សាទុកនៅប៉ុស្តិ៍នគរបាលរដ្ឋបាលបាវិតដើម្បីបំពេញសំណុំរឿងចាត់តាមច្បាប់ ៕ យឹម សុថាន
