អគ្គលេខាធិការអង្គការសហប្រជាជាតិបំពេញទស្សនកិច្ចទៅកាន់បង់ក្លាដែស

អគ្គលេខាធិការអង្គការសហប្រជាជាតិ បានចាប់ផ្តើមបំពេញទស្សនកិច្ច ទៅកាន់ ប្រទេសបង់ក្លាដែស ពិសេសគឺជំរំជន ភៀសខ្លួនរ៉ូហ៊ីងយ៉ា ដែលភៀសខ្លួនចេញ ពីមីយ៉ាន់ម៉ា ចូលទៅស្នាក់នៅប្រទេស បង់ក្លាដែស។ លោក Antonio Guterres ទៅកាន់ជំរំជនភៀសខ្លួន Kutupalong នៅ តំបន់ Cox’s Bazar ប្រទេសបង់ក្លាដែស ថ្ងៃទី២កក្កដា២០១៨។

អគ្គលេខាធិការ អ.ស.ប លោក Antonio Guterres បានវាយតម្លៃថា ”អំពើដ៏ សាហាវយង់ឃ្នងនានាដែលលោកបានស្តាប់ឮពីការរៀបរាប់របស់ជនភៀសខ្លួន រ៉ូហ៊ីងយ៉ានោះ គឺជារឿងមួយដែលគេពុំនឹកស្មានដល់ឡើយ។

នៅតំបន់ Cox’s Bazar ភាគខាងត្បូង ប្រទេសបង់ក្លាដែស ក្នុងជំរំជនភៀសខ្លួន រ៉ូហ៊ីងយ៉ា លោក Antonio Guterres អគ្គ លេខាធិការ អ.ស.ប. បានស្តាប់ឮការរៀបរាប់របស់ជនភៀសខ្លួនរ៉ូហ៊ីងយ៉ាដែលទើបបានរត់ភៀសខ្លួនពីមីយ៉ាន់ម៉ា នាពេល ថ្មីៗនេះ ។ ជាការរៀបរាប់ អំពី ការកាប់សម្លាប់និងការរំលោភបំពានផ្លូវភេទលើប្រជាជនរ៉ូហ៊ីងយ៉ា ដែលលោក Guterres បាន វាយតម្លៃថា “ជារឿងមួយដែលគេពុំអាច នឹកស្មានដល់”។

នៅលើគណនី Twitter អគ្គលេខា ធិការអ.ស.ប. បានថ្លែងបញ្ជាក់ថា ជន ភៀសខ្លួនរ៉ូហ៊ីងយ៉ា ទាមទាររកយុត្តិធម៌និងការវិលត្រឡប់ទៅកាន់ភូមិឋានរបស់ពួកគេវិញ នៅក្នុង លក្ខខណ្ឌសុវត្ថិភាព”។

អមដំណើរដោយប្រធានធនាគារពិភព លោក Jim yong Kim លោក Guterres ក៏បានចាត់ទុកដំណើរទស្សនកិច្ចរបស់លោកនៅតំបន់ Coxs Bazar នេះ ថាជាបេសក កម្មមួយ ដើម្បីសាមគ្គីភាពជាមួយជនភៀសខ្លួនរ៉ូហ៊ីងយ៉ានិងសហគមន៍នានាដទៃ ផ្សេងទៀតដែលបានជួយគាំទ្រដល់ជនភៀសខ្លួនរ៉ូហ៊ីងយ៉ា។

តាមរយៈប្រព័ន្ធសង្គមដដែល លោក Guterres នាពេលអញ្ជើញទៅដល់តំបន់ Coxs Bazar ដែលនៅជាប់ព្រំដែនមីយ៉ាន់ ម៉ា បានថ្លែងបញ្ជាក់ទៀតថា”ចិត្តមេត្តាធម៌និងសប្បុរសធម៌របស់ពលរដ្ឋបង់ក្លាដែស បានបង្ហាញយ៉ាងច្បាស់ពីភាពល្អប្រសើរ របស់មនុស្សជាតិនិង បានជួយសង្គ្រោះជីវិតមនុស្សជាច្រើនពាន់នាក់ទៀតផង”៕ ម៉ែវ សាធី