សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជនជាតិចិនម្នាក់បើករថយន្តស្តារិចក្នុងល្បឿនលឿនសង្ស័យស្រវឹងបានរេចង្កូតបុករបាំងថ្មពុះចែកទ្រូងផ្លូវបណ្តាលអោយបាក់អស់មួយផ្ទាំង ចំណែករថយន្តដាច់កាឡេបើកទៅមុខលែងរួច ។
ហេតុការណ៍បង្កឲ្យមានការភ្ញាក់ផ្អើលកាលពីវេលាម៉ោង១១យប់ ថ្ងៃព្រហស្បតិ៍ ៦រោច ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២ ខែសីហា ឆ្នាំ២០១៨ តាមបណ្ដោយផ្លូវសហព័ន្ធរុស្សី ទល់មុខអាកាសយាន្តដ្ឋានអន្តរជាតិភ្នំពេញ ស្ថិតនៅភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញរថយន្តបង្កមួយគ្រឿងម៉ាកស្តារិច ពណ៍ទឹកប្រាក់ ពាក់ស្លាកលេខ កំពង់ស្ពឺ ២B-១២៦០ បើកបរដោយបុរសជនជាតិចិនម្នាក់ ធ្វើដំណើរតាមបណ្តោយផ្លូវមហាវិថីសហព័ន្ធរ៉ូស្សុី ក្នុងទិសដៅពីកើតទៅលិច ល្បឿនយ៉ាងលឿនសង្ស័យស្រវឹងលុះបើកមកដល់ចំណុចកើតហេតុស្រាប់តែរថយន្តបានរេចង្កូតទៅផ្នែកខាងឆ្វេងបុករបាំងថ្មពុះចែកទ្រូងផ្លូវខ្ទាតចេញអស់មួយផ្ទាំង ចំណែករថយន្តបង្កផ្ទុះពោងការពារសុវត្ថិភាព បណ្តាលឱ្យបុរសជាជនជាតិចិនដែលជាអ្នកបើកបររថយន្តអត់ពាក់ខ្សែក្រវាត់រថយន្តបោកក្បាលនឹងកញ្ចក់រថយន្តខាងមុខបែកកញ្ចក់ រងរបួសស្រាល ។
ប្រភពព័ត៌មានបានបន្តទៀតថា បន្ទាប់ពីកើតហេតុ បុរសជនជាតិចិនខាងលើបំរុងបើករថយន្តចេញពីកន្លែងកើតហេតុ តែរថយន្តខាងលើបានដាច់កាឡេបើកទៅមុខលែងរួច ក៏ចុះពីលើរថយន្តឡើងជិះរ៉ឺម៉កម៉ូតូកង់បីគេចខ្លួនបាត់ស្រមោល បន្សល់ទុកតែរថយន្តនៅកន្លែងកើតហេតុ ។
ក្រោយពេលកើតហេតុនគរបាលមូលដ្ឋានបានចុះមកដល់ចំណុចកើតហេតុនិងសហការជាមួយជំនាញស្ទូចរថយន្តបង្កទៅរក្សាទុក្ខនៅការិយាល័យចរាចរណ៍ជើងគោករាជធានីភ្នំពេញរង់ចាំម្ចាស់ចូលខ្លួនមកដោះស្រាយតាមច្បាប់ ៕ សុខាសែនជ័យ
