សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មានការបញ្ចេញមតិច្រើន ជុំវិញការសម្រេចចិត្តដ៏ភ្ញាក់ផ្អើលរបស់លោកហម ម៉េងសែ ចៅក្រមស៊ើបសួរសាលាដំបូងរាជធានីភ្នំពេញ ដែលមិនឃុំខ្លួនស្ត្រីម្ចាស់ទីតាំងផលិតប៊ីចេងក្លែងក្លាយចំនួន១៧តោន រួចដោះលែងឱ្យមានសេរីភាពវិញ ។
ក្រោយទទួលដំណឹងអំពីការដោះលែងនេះ អ្នកលេងហ្វេសប៊ុក មានមតិផ្សេងៗ ដែលភាគច្រើន គឺ មិនយល់ស្របចំពោះការដោះលែងនេះឡើយ ។
Rathana Dy បញ្ចេញមតិថា “ជាអ្វីដែលប្រជាពលរដ្ឋភាគច្រើនបាត់បង់ទំនុកចិត្តលើប្រព័ន្ធយុត្តិធម៌ ។ Pisey Attila សរសេរថា”ព្រោះតែលុយមនុស្សហ៊ានធ្វើគ្រប់យ៉ាងមិនខ្វល់នរណាស្លាប់ឬក៏រស់នោះទេ”។
អ្នកលេងហ្វេសប៊ុកម្នាក់ទៀត សរសេរថា”អាណិតតែប៉ូលិសទេខំចាប់ច្បាប់អ្នកដោះ”។ នៅមានការបញ្ចេញមតិជាច្រើនទៀតជុំវិញការសម្រេចចិត្តដោះលែងនេះ ។
គួរបញ្ជាក់ថា ស្ត្រីឈ្មោះ សុខ វួចលីន ជាម្ចាស់ទីតាំងផលិតប៊ីចេងក្លែងក្លាយរាប់តោន នៅខណ្ឌឫស្សីកែវ ត្រូវបានលោកហម ម៉េងសែ ចៅក្រមស៊ើបសួរសាលាដំបូងរាជធានីភ្នំពេញ នៅល្ងាចថ្ងៃទី៣១ ខែសីហា នេះ សម្រេចដោះលែងឱ្យមានសេរីភាពឡើងវិញ ។
ប្រភពព័ត៌មានច្បាស់ការណ៍ បង្ហើបឱ្យដឹងថា ការសម្រេចមិនឃុំខ្លួនជនត្រូវចោទ សុខ វួចលីន នេះ គឺលោកចៅក្រម ហម ម៉េងសែ បានដាក់ឱ្យស្ថិតក្រោមការត្រួតពិនិត្យតាមផ្លូវតុលាការ ។
មជ្ឈដ្ឋានជាច្រើន លើកឡើងថា ត្រឹមផលិតប៊ីចេងក្លែងក្លាយ ធ្វើឱ្យប៉ះពាល់សុខភាពពលរដ្ឋប៉ុណ្ណោះ ។ ការដោះលែងនេះ គឺ ជាឆន្ទានុសិទ្ធិរបស់របស់លោកចៅក្រម ហម ម៉េងសែ ដែលជាអំណាចឯករាជ្យ ។
ស្ត្រីម្នាក់ជាម្ចាស់ទីតាំងវេចខ្ចប់ប៊ីចេង រស់នៅផ្ទះ លេខAB4-5 ផ្លូវ56R សង្កាត់ទួលសង្កែទី២ ខណ្ឌឫស្សីកែវ ឈ្មោះសុខ វួចលីន អាយុ៤១ឆ្នាំ បានត្រូវសមត្ថកិច្ចឃាត់ខ្លួនកាលពីព្រឹកថ្ងៃទី២៧ ខែសីហា ក្នុងប្រតិបត្តិការចុះឆែកឆេរទីតាំងវេចខ្ចប់ប៊ីចេងដែលសមត្ថកិច្ចចោទថាក្លែងក្លាយ។
ក្នុងប្រតិបត្តិការនេះសមត្ថកិច្ចដកហូតភស្តុតាមួយចំនួនមាន ប៊ីចេងបាវសចំនួន ៣៥២បាវ ប៊ីចេងបាវគគីរចំនួន ១២៥បាវ ប៊ីចេងរាយម៉ាកWin winចំនួន ១៤០បាវ ប៊ីចេងច្រករួច(500g)ចំនួន ៣២បាវ ប៊ីចេងច្រករួចម៉ាកGold Cupចំនួន ៤៧កេស ប៊ីចេងរូបវែក(250g) និងប៊ីចេងរាយមិនទាន់វេចខ្ចប់មួយចំនួនទៀតសរុបទំងន់ទាំងអស់ប្រមាណ១៧តោន ៕ចេស្តា
