សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថភ្លើងដឹកអ្នកដំណើររបស់ស្ថានីយរថភ្លើង រាជធានីភ្នំពេញ បើកឆ្លងកាត់ផ្លូវដោយគ្មានដាក់ប៉ារ៉ាសហាមឃាត់ រួចជ្រុលទៅបុកម៉ូតូឡាំប្រ៊ឺតា(ឥណ្ឌា)ដឹកភ្ញៀវមួយគ្រឿង ដែលកំពុងបើកឆ្លងកាត់ផ្លូវរថភ្លើងចំពាក់កណ្តាលម៉ូតូពេញទំហឹងអូសជិត២០ម៉ែត្រ និងបណ្ដាលឲ្យភ្ញៀវម្នាក់ក្នុងចំណោម៤នាក់របួសបាក់ជើងម្ខាង ។
ករណីគ្រោះថ្នាក់ចរាចរណ៍ខាងលើនេះ កើតឡើងកាលពីវេលាម៉ោង២និង១០នាទីរំលងអធ្រាត្រឈានចូលថ្ងៃសៅរ៍ ៦កើត ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៥ ខែកញ្ញា ឆ្នាំ២០១៨ ត្រង់ចំណុចច្រកចូលវត្តនាគវ័ន្ត តាមបណ្ដោយផ្លូវលេខ១៣២កែងនឹងផ្លូវរថភ្លើង ស្ថិតក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
យោងតាមប្រភពពីអ្នកឃើញហេតុការណ៍នេះ បានឲ្យដឹងថា មុនពេលកើតហេតុគេឃើញបុរសម្នាក់បើកបរម៉ូតូឡាំប្រ៊ឺតា ពណ៌ស ពាក់ស្លាកលេខ ស្វាយរៀង1M-4107 និងដឹកភ្ញៀវ៤នាក់ទៀតសុទ្ធតែមនុស្សប្រុស ដោយធ្វើដំណើរតាមបណ្ដោយផ្លូវលេខ១៣២ ក្នុងទិសដៅពីជើងទៅត្បូង។ លុះមកដល់ចំណុចកើតហេតុ ក៏បានបើកឆ្លងកាត់ផ្លូវរថភ្លើង ខណៈពេលនោះស្រាប់តែមានរថភ្លើងដឹកអ្នកដំណើររបស់ស្ថានីយរថភ្លើងរាជធានីភ្នំពេញមួយខ្សែ ដោយបើកចេញពីអាកាសយន្តដ្ឋានអន្តរជាតិពោធិ៍តុងឆ្ពោះចូលទៅស្ថានីយន៍រថភ្លើងភ្នំពេញ ក្នុងទិសដៅពីលិចទៅកើត ក៏ជ្រុលទៅបុកម៉ូតូឡាំប្រ៊ឺតា ចំពាក់កណ្តាលទាំងកំរោល បណ្តាលឱ្យម៉ូតូកៀបជាប់រថភ្លើងអូសជិត២០ម៉ែត្ររងការខូចខាតយ៉ាងដំណំ និងបណ្តាលឱ្យបុរសម្នាក់ជាភ្ញៀវរបួសបាក់ជើងខាងស្តាំ ភ្លាមនោះត្រូវបានមិត្តភក្តិដឹកយកទៅសង្គ្រោះនៅឯមន្ទីរពេទ្យភ្លាមៗតែម្តង ។
បើកតាមសម្តីពីបុរសដែលជាអ្នកបើកបរម៉ូតូឡាំប្រ៊ឺតា ក៏បានឲ្យដឹងដែរថា នៅមុនពេលកើតហេតុ គាត់បានដឹកភ្ញៀវទាំង៤នាក់ចេញមកពីម្តុំវត្តនាគវ័ន្តបំណងដឹកទៅម្តុំឃ្លាំងរំសេវ លុះមកដល់ចំណុចកើតហេតុ ដោយមិនឃើញមានបិទប៉ារ៉ាសជាសញ្ញាប្រាប់ថាមានរថភ្លើងបើកឆ្លងកាត់ និងពុំមានឮសម្លេងស៉ីផ្លេរបស់រថភ្លើង គួបផ្សំទាំងស្ថានភាពនៅកន្លែងកើតហេតុមានផ្ទះបាំងមិនអាចមើលឃើញរថភ្លើងដែលបើកឆ្លងកាត់ថែមទៀតផង ។ ពេលនោះគាត់ក៏បានបើកម៉ូតូកង់៣ឆ្លងកាត់ផ្លូវរថភ្លើង ហើយក៏ត្រូវរថភ្លើងបើកមកបុកតែម្តង ។
ក្រោយកើតហេតុរថភ្លើង បានបើកបន្តដំណើរចូលទៅក្នុងស្ថានីយរថភ្លើង ភ្នំពេញបាត់ទៅ ។ ដោយឡែកម៉ូតូឡាំប្រ៊ឺតា(ឥណ្ឌា) ត្រូវបានសមត្ថកិច្ចជំនាញចុះមកយកទៅរក្សាទុកនៅអធិការដ្ឋាននគរបាលខណ្ឌទួលគោកបណ្ដោះអាសន្ន ដើម្បីរង់ចាំធ្វើដោះស្រាយនៅពេលក្រោយ ៕ស តារា
