កំពុងតែជួបគ្រោះថ្នាក់ចរាចរណ៍ហើយ នៅមានរថយន្ត១គ្រឿងឆ្លៀតមកបុកទៀត រដូករណែលពេញផ្លូវ

ខេត្តស្វាយរៀង៖ យ៉ាងហោចណាស់បុរស២នាក់រងរបួសធ្ងន់ ដោយមានករណីគ្រោះថ្នាក់ចរាចរណ៍គួរឲ្យរន្ធត់ និងស៊យជាន់លើស៊យ ដែលនឹកស្មានមិនដល់ បង្កឡើងដោយរថយន្តម៉ាក ISUZU ពណ៌ ត្រេអ៊ី ពាក់ស្លាកលេខ ខេមរភូមិន្ទ ដោយឈប់លើផ្លូវជាតិលេខ១៣ ស្រាប់តែមានម៉ូតូធំមួយគ្រឿងម៉ាក Yamaha បើកខ្វះប្រុងប្រយត្ន័បុកពីក្រោយយ៉ាងពេញទំហឹង ខណៈសមត្ថកិច្ចកំពុងធ្វើចរាចរណ៍ ក៏មានរថយន្តមួយគ្រឿងទៀតម៉ាកសាំយ៉ុង ពណ៌សបើកបុករថយន្តពណ៏ទាហានពាក់ស្លាកលេខ ខេមរភូមិន្ទពីក្រោយពេញទំហឹងលាន់សូរដូចរន្ទះកាលពីវេលាម៉ោង១០យប់ ថ្ងៃទី២៣ ខែកញ្ញា ឆ្នាំ២០១៨ ត្រង់ចំណុចភូមិត្រពាំងក្រែត ឃុំជ្រុងពពេល ស្រុករំដួល ខេត្តស្វាយរៀង។

បើតាមសមត្ថកិច្ចនគរបាលស្រុកបានឲ្យកាសែតនគរវត្តដឹងថា បុរសរងរបួសធ្ងន់ ដែលជិះម៉ូតូធំមានឈ្មោះ យ៉ាន យ៉ន អាយុ២៣ឆ្នាំ រស់នៅភូមិត្រពាំងដំរី ឃុំកំពង់អំពិល ស្រុករំដួល ខេត្តស្វាយរៀង។

ចំពោះអ្នកបើករថយន្តមួយគ្រឿងទៀតម៉ាកសាំយ៉ុង ពណ៌ស ដែលរងរបួសធ្ងន់ដូចគ្នា មានឈ្មោះ តូច មណ្ឌល អាយុ៣៥ ឆ្នាំ រស់នៅភូមិតាសក់ ឃុំកំពង់អំពិល ស្រុករំដួល ខេត្តស្វាយរៀង។

តាមសាក្សីបានឲ្យដឹងថា មុនពេលកើតហេតុមានរថយន្តមួយគ្រឿងម៉ាកISUZU ពណ៌ត្រេអ៊ី ពាក់ស្លាកលេខ ខ ម 4-2892 ដែលកំពុងចតនៅស្ងៀមទិសដៅពីត្បូងមកជើងលើកំណាត់ផ្លូវជាតិលេខ ១៣ ខណៈនោះស្រាប់តែមានបុរសម្នាក់ជិះម៉ូតូមួយគ្រឿងម៉ាកYamaha(ម៉ូតូធំ)ពណ៌ខ្មៅ ពាក់ស្លាកលេខ ស្វាយរៀង 1L4207 ក្នុងទិសដៅស្របគ្នាពីត្បូងទៅជើងបុកគូថរថយន្តពេញទំហឹងបង្កការភ្ញាក់ផ្អើលបណ្តាលឲ្យរងរបួសធ្ងន់ធ្ងរ ។

ក្រោយមកពេល ដែលសមត្ថកិច្ចកំពុងតែអន្តរាគមន៍ជួយលើកជនរងគ្រោះដាក់លើឡានពេទ្យ បញ្ជួនទៅខេត្តស្រាប់តែមានរថយន្ត1គ្រឿងម៉ាកសាំយ៉ុង ពណ៌ស ពាក់ស្លាកលេខ ភ្នំពេញ 2P7564 បើកបរដោយបុរសម្នាក់បុកគូថចំពីក្រោយរថយន្តពាក់ស្លាកលេខ ខេរភូមិន្ទបន្តទៀតនឹកស្មានមិនដល់។

សមត្ថកិច្ចនគរបាលបញ្ជាក់ថា មូលហេតុដោយសារតែអ្នកជិះម៉ូតូ និងរថយន្តសាំយ៉ុងបើកបរខ្វះការប្រុងប្រយ័ត្ន។

ចំណែករថយន្ត និងម៉ូតូទាំង៣គ្រឿង សមត្ថកិច្ចអូសមករក្សាទុកនៅអធិការនគរបាលស្រុកដើម្បីដោះស្រាយតាមនីតិវិធី ៕ យឹម សុថាន