សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្ត មួយគ្រឿងបុកម៉ូតូមួយគ្រឿងបណ្តាលឲ្យបុរសម្នាក់ស្លាប់ និងម្នាក់ទៀតរងរបួសធ្ងន់ បន្ទាប់ពីកើតហេតុរថយន្តបង្កបើកគេចខ្លួនបាត់ តែប្រជាពលរដ្ឋបានស្គាល់ភិនភាគរថយន្តបង្ក ម៉ាកតូយ៉ូតាហ៊ីលុច្ស វីហ្គោ ពណ៌ទឹកមាស ពាក់ស្លាកលេខព្រះសីហនុ 2A-9777 ។
ហេតុការណ៍គ្រោះថ្នាក់ចរាចរនេះបានកើតឡើងកាលពីម៉ោង១១យប់ ថ្ងៃទី២៤ ខែកញ្ញា ឆ្នាំ២០១៨ នៅចំណុចផ្លូវR6 សង្កាត់ស្រះចក ខណ្ឌដូនពេញ រាជធានីភ្នំពេញ ។
សមត្ថកិច្ចបានឲ្យដឹងថា សពជនរងគ្រោះឈ្មោះ សំ សាត អាយុ៣០ឆ្នាំ ជនជាតិខ្មែរ មុខរបរធ្វើការនៅធនាគារជាតិនៃកម្ពុជា រស់នៅភូមិស្រែឫស្សី ឃុំអំពិល ស្រុករមាសហែក ខេត្តស្វាយរៀង ។ ចំណែកអ្នករងរបួសធ្ងន់មិនទាន់ស្គាល់អត្តសញ្ញាណនៅឡើយទេ។
ប្រភពព័ត៌មាននៅកន្លែងកើតហេតុបានឲ្យដឹងថា គេឃើញបុរស២នាក់បើកម៉ូតូមួយគ្រឿងម៉ាកហុងដា ឌ្រីមសង់ស៊េរី ឆ្នាំ ២០១៧ សេ ១២៥ ពណ៌ខ្មៅ ពាក់ស្លាកលេខ ភ្នំពេញ1GD-5850 តាមបណ្តោយផ្លូវ R6 ក្នុងទិសដៅពីលិចទៅកើត ។ ខណៈមកដល់ចំណុចកើតហេតុ ស្រាប់តែមានរថយន្តម៉ាកតូយ៉ូតា ហ៊ីលុច្ស វីហ្គោ ពណ៌ទឹកមាស បើកតាមបណ្តោយផ្លូវR6 ក្នុងទិសដៅពីត្បូងទៅជើង យ៉ាងលឿនបានបុកជាមួយម៉ូតូពេញទំហឹងបណ្តាលឲ្យបុរសម្នាក់រងរបួសធ្ងន់បាក់ជើងត្រូវបញ្ជូនទៅកាន់មន្ទីរពេទ្យ និងម្នាក់ទៀតបោកក្បាលស្លាប់ភ្លាមៗនៅនឹងកន្លែងកើតហេតុ ។ ចំណែករថយន្តព្យាយាមបើករត់គេចខ្លួន តែមានពលរដ្ឋដេញថតបានស្លាកលេខរថយន្ត។
បន្ទាប់ពីកើតហេតុ ម៉ូតូជនរងគ្រោះត្រូវបញ្ជូនទៅការិយាល័យចរាចរផ្លូវគោករាជធានីភ្នំពេញ រង់ចាំបងប្អូនជនរងគ្រោះយកឯកសារមកទទួលវិញ រីឯសពត្រូវបានប្រគល់ជូនសាច់ញាតិធ្វើបុណ្យតាមប្រពៃណី ។ ចំណែកឯរថយន្តបង្កហេតុ ពេលនេះសមត្ថកិច្ចបាននិងកំពុងស្រាវជ្រាវតាមរយៈស្លាកលេខដែលពលរដ្ឋថតបាននេះហើយ ជ្រោយពេជ្រ
