សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសទំនងស្រវឹងស្រាម្នាក់បានជិះម៉ូតូរេចង្កូតទៅបុកនឹងបង្គោលបេតុងយ៉ាងពេញទំហឹងលាន់សូរដូចរន្ទះ បង្កការភ្ញាក់ផ្អើលដល់អ្នកភូមិ នាំគ្នាជួយសង្គ្រោះ ប៉ុន្តែអកុសល ដោយរបួសធ្ងន់ធ្ងរពេក បានស្លាប់នៅមន្ទីរពេទ្យបង្អែកខេត្តស្វាយរៀង ។
ហេតុការណ៍នេះ បានកើតឡលងកាលពីវេលាម៉ោង៣និង៤៥នាទីរសៀល ថ្ងៃទី២៥ ខែកញ្ញា ឆ្នាំ២០១៨ ស្ថិតនៅចំណុចផ្លូវចូលរបងវត្តត្នោត ប៉ែកខាងកើត ស្ថិតក្នុងភូមិបុណ្យ ឃុំត្នោត ស្រុកកំពង់រោទ៍ខេត្តស្វាយរៀង ។
បើតាមសមត្ថកិច្ចនគរបាលស្រុកបានឲ្យកាសែតនគរវត្តដឹងថា បុរសដែលស្លាប់មានឈ្មោះ ផាក និមល អាយុ 28ឆ្នាំ មាន ទីលំនៅបច្ចុប្បន្ន ភូមិ តែងម៉ៅ ឃុំចន្រ្ទា ស្រុកចន្រ្ទា ខេត្តស្វាយរៀងខណៈជិះម៉ូតូម៉ាក ហុងដា C100 ពណ៌ខ្មៅ អត់ស្លាកលេខ ខូចខាតយ៉ាងដំណំ ។
តាមសាក្សីបានប្រាប់ឲ្យដឹងថា មុនកើតហេតុគេឃើញបុរសម្នាក់ជិះម៉ូតូមួយគ្រឿង ធ្វើដំណើរពីជើងមកត្បូង ក្នុងល្បឿនលឿន ហើយទំនងជាស្រវឹងស្រា ស្រាប់តែមកដល់នៅចំណុចផ្លូវចូលរបងវត្តត្នោត ប៉ែកខាងកើត ក៏បុកនឹងបង្គោលចាក់បេតុងពេញទំហឹងបង្កការភ្ញាក់ផ្អើលដល់អ្នកភូមិ និងរាយការណ៍មកសមត្ថកិច្ចមូលដ្ឋាន និងក្រុមគ្រួសារមកពិនិត្យ និងបញ្ជូនមកមណ្ឌលសុខភាពត្នោត ប៉ុន្តែសភាពធ្ងន់បញ្ជូនបន្តទៅមន្ទីរពេទ្យបង្អែកជីភូ គ្រូពេទ្យមិនហ៊ានមើល ក៏ បានបញ្ជូនបន្តរហូតដល់មន្ទីរពេទ្យបង្អែកខេត្តស្វាយរៀង ក៏ផុតដង្ហើម ។
សពត្រូវបានសមត្ថកិច្ចនគរបាលប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីទាំងក្ដុកក្ដួលបំផុត ៕ យឹម សុថាន
