សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជន២នាក់បើកម៉ូតូ ឌុបគ្នាយ៉ាងលឿនបានជ្រុលចង្កូតទៅបុរថយន្តមួយគ្រឿងពេញទំហឹង បណ្តាលរងរបួសធ្ងន់ទាំង២នាក់ ចំណែករថយន្តបើកបន្តដំណើរទៅមុខបាត់ស្រមោល ។
ហេតុការណ៍នេះបានកើតហេតុឡើងកាលពីម៉ោង១ និង៣០នាទីរំលងអធ្រាត្រ ឈានចូលថ្ងៃទី៤ ខែតុលា ឆ្នាំ២០១៨ ស្ថិតនៅតាមបណ្តោយផ្លូវលេខ១៨២ កែង និងផ្លូវលេច២៦៥ ចំណុចស្តុបសំណង់(១២) ក្នុងសង្កាត់ទឹកល្អក់៣ ខណ្ឌទួលគោក ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញយុវជន២នាក់បើកម៉ូតូមួយគ្រឿងម៉ាកហុងដាឌ្រីមសង់ស៊េរី២០១៥ ពណ៌ខ្មៅ ពាក់ស្លាកលេខ ភ្នំពេញ 1CW-4409 ឌុបគ្នាតាមបណ្តោយផ្លូវលេខ២៦៥ ក្នុងទិសដៅពីត្បូងទៅជើងលឿន ខណៈមកដល់ចំណុចកើតហេតុដែលជាផ្លូវបែកជាបួន បានជ្រុលចង្កូតទៅបុចរថយន្តតាកូម៉ា មួយគ្រឿង មិនចាំស្លាកលេខ បើកបរតាមបណ្តោយផ្លូវ១៨២ ទិសដៅពីលិចទៅកើតចំពាក់កណ្តាលរថយន្តពេញទំហឹងបណ្តាលឲ្យជនរងគ្រោះទាំង២នាក់រងរបួសធ្ងន់ត្រូវបានរថយន្តសង្គ្រោះគ្លីនិកហុងហាក់ ដឹងយកទៅសង្គ្រោះភ្លាមៗ ។ ចំណែករថយន្តមិនបានឈប់នៅកន្លែងកើតហេតុនោះទេ បានបន្តដំណើរទៅមុខទៀតបាត់ស្រមោល រីឯម៉ូតូខូចខាតស្ទើរទាំងស្រុង ។
បន្ទាប់ពីកើតហេតុសមត្ថកិច្ចមូលដ្ឋានបានចុះដល់បានទំនាក់ទំនងទៅសមត្ថកិច្ចជំនាញចរាចរ ចុះមកយកម៉ូតូជនរងគ្រោះទៅរក្សាទុកនៅអធិការដ្ឋាននគរបាលខណ្ឌទួលគោក រង់ចាំសាច់ញាតិយកឯកសារមកផ្ទៀងផ្ទាត់យកត្រឡប់ទៅផ្ទះវិញ ៕ ជ្រោយពេជ្រ
