សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ឃួង ស្រេង អភិបាលរាជធានីភ្នំពេញ ចុះពិនិត្យហេដ្ឋារចនាសម្ព័ន្ធមហាវិថីឈ្នះឈ្នះ ស្ថិតនៅ សង្កាត់ព្រែកតាសេក ខណ្ឌជ្រោយចង្វារ តំបន់អភិវឌ្ឍន៍លីយ៉ុងផាត់ ដើម្បីឈូសឆាយព្រៃត្រែង កាយទឹកបង្ហូដាក់លូ នឹងត្រៀមរៀបចំតុបតែងដាក់ភ្លើងពណ៌ និងសន្តិសុខសណ្តាប់ធ្នាប់ សម្រាប់ ថ្ងៃសម្ពោធវិមានឈ្នះឈ្នះ ដែលសម្តេចតេជោ ជាអធិបតី ។
នៅក្នុងដំណើរចុះពិនិត្យហេដ្ឋារចនាសម្ព័ន្ធ នៅទីតាំងខាងលើ នៅល្ងាចថ្ងៃព្រហស្បតិ៍ ២កើតខែអស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១១ ខែតុលា ឆ្នាំ២០១៨ លោក ឃួង ស្រេង អភិបាលរាជធានីភ្នំពេញ ក៏បានបញ្ជាឲ្យមន្ទីរសាធារណការក្រុងត្រូវពន្លឿន ការងារទ្រួសត្រាយ ព្រៃត្រែងដែលនៅជុំវិញវិមានឈ្នះឈ្នះ នឹងត្រូវធ្វើការងារឈូសឆាយឲ្យអស់ ។ ចំពោះទឹកដែលដក់នៅក្រោយវិមានឈ្នះឈ្នះ និងនៅខាងលិចវិមាន ក៏ត្រូវរំដោះទឹកចេញផងដែរ ដោយកាយដាក់លូបង្ហូរឲ្យហូរចូលក្នុងលូ ។
លោកបានបញ្ជាក់ថា៖ ការរៀបចំដូច្នេះ គឺដើម្បី ឲ្យមានសោភ័ណ្ឌភាព និងមានភាពងាយស្រួលក្នុងការរៀបចំសន្តិសុខសណ្តាប់ធ្នាប់ ជូនប្រជាពលរដ្ឋ ។ កម្មវិធីសម្ពោធវិមានឈ្នះឈ្នះ នឹងប្រារព្ធឡើងនៅថ្ងៃទី២៩ ខែធ្នូ ឆ្នាំ២០១៨ ក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន ។
លោកអភិបាលរាជធានីភ្នំពេញ ក៏បានបញ្ជាឲ្យមន្ទីរសុខា ភិបាលរាជធានី ក្នុងឱកាសសម្ពោធនោះ ត្រូវដាក់រថយន្ដសង្គ្រោះ នៅពីមុខវិមានឈ្នះឈ្នះ ២កន្លែង ចំនួន២០គ្រឿង ដើម្បីជួយសង្គ្រោះ ប្រជាពលរដ្ឋក្រែងមានជំងឺផ្សេងៗ ក្នុងពេលកម្មវិធីនោះចាប់ផ្ដើម ក្រោមអធិបតីភាពសម្ដេចអគ្គ មហាសេនាបតីតេជោហ៊ុន សែន ។
លោកបានបន្ដថា៖ ក្រៅពីការងាររៀបចំសណ្តាប់ធ្នាប់សាធារណៈ សាលារាជធានីភ្នំពេញ នឹងរៀបចំតុបតែងតាំងភ្លើងពណ៌ អគ្គិសនីបំភ្លឺនៅតាមដងផ្លូវមហាវិថីឈ្នះឈ្នះពី គល់ស្ពានព្រែកព្នៅ រហូតដល់ផ្លូវជាតិលេខ៦ នឹងបើកឲ្យប្រជាពលរដ្ឋ និងភ្ញៀវអន្តរជាតិចូលរួមទស្សនា នូវសមត្ថលទ្ធផលនានា ដែលបានទទួលបានជោគជ័យ និងស្វែងរកសន្តិភាពជូនប្រទេសកម្ពុជា និងមានការរីកចំរើនលើគ្រប់វិស័យរហូតមកដល់សព្វថ្ងៃនេះ ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា៖ ខាងមន្ទីរនឹងរៀបចំដាក់ភ្លើងអគ្គិសនីបំភ្លឺតាមដើមច័ន្ទគីរីទាំងអស់នៅតាមបណ្តោយផ្លូវ រៀបចំដាក់ប្រព័ន្ធលូចំងាយជិត៥០០ម៉ែត្រ និងឆ្លាក់អក្សរលើផ្ទាំងសិលាចារឹក ជាវិថីវិមានឈ្នះឈ្នះ ដាក់នៅដើមផ្លូវ ។ ចំពោះការងារនេះ គឺខាងមន្ទីរសាធារណការបានធ្វើរួចរាល់ខ្លះមកហើយ ដូចជាការដាក់លូជាដើម ។
លោក នាយឧត្តមសេនីយ៍ ណឹម សុវត្ថិ អគ្គនាយក អគ្គនាយកដ្ឋាននយោបាយ និងកិច្ចការបរទេស នៃក្រសួង ការពារជាតិ និងជាប្រជាប្រធានក្រុមការងារសាងសង់វិមានឈ្នះឈ្នះ បានបញ្ជាក់ថា៖ នៅថ្ងៃទី២៩ ខែធ្នូ ឆ្នាំ១៩៩៨ គឺជាថ្ងៃបញ្ចប់សង្រ្គាមស៊ីវិល និងទទួលបានសន្តិភាពពេញលេញនៅកម្ពុជា តាមរយៈនយោបាយឈ្នះឈ្នះ របស់សម្តេចតេជោ ហ៊ុន សែន ហៅកាត់ថា ទិវានយោបាយឈ្នះឈ្នះ ។ តាមរយៈសន្តិភាពរកបានដោយលំបាកនៃនយោបាយឈ្នះឈ្នះនោះហើយ ដែលបង្កើតឱកាសមាស ឱកាសពេជ្រ សម្រាប់ការអភិវឌ្ឍសេដ្ឋកិច្ច និងសង្គមនៅកម្ពុជា ។ លោកបន្ថែមថា៖ វិមានឈ្នះឈ្នះនេះ គឺបានរៀបចំចម្លាក់ ស្តីពីចម្លាក់ទិវាចងចាំឆ្ពោះទៅការផ្តួលរំលំរបបប្រល័យពូជសាសន៍ និងចម្លាក់់ដំណើរជាតិកម្ពុជានាទសវត្សរ៍ឆ្នាំ៨០ និងដើមឆ្នាំ៩០ ដាក់តាំងបង្ហាញនៅជាន់ផ្ទាល់ដីផ្នែកខាងក្រៅវិមាន ។
សូមបញ្ជាក់ថា៖ វិមានឈ្នះឈ្នះចាប់ផ្តើមសាងសង់នៅក្នុងខែកុម្ភៈ ឆ្នាំ២០១៦ ដែលសង់នៅផ្ទៃដីចំនួន១៥ ហិកតា មានកម្ពស់វិមានចំនួន៥៤ម៉ែត្រ ស្ថិតនៅក្នុងតំបន់អភិវឌ្ឍន៍លីយ៉ុងផាត់ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ៕ សំរិត
