សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន៖ កម្លាំងការិយាល័យប្រឆាំងបទល្មើសគ្រឿងញៀន នៃស្នងការខេត្តប៉ៃលិន បានចុះឃាត់ ខ្លួនជនសង្ស័យម្នាក់ក្នុងករណីប្រើប្រាស់ និងជួញដូរនៅសារធាតុញៀនខុសច្បាប់ ។
រីឯជនសង្ស័យក្រោយពីឃាត់ខ្លួនរួច កម្លាំងជំនាញការិយាល័យបទល្មើសគ្រឿងញៀន នៃស្នងការខេត្ត បានបញ្ជូនមកស្នងការខេត្តប៉ៃលិន ព្រមទាំងវត្ថុតាងមួយចំនួន ។
មន្ត្រីជំនាញប្រឆាំងបទល្មើសគ្រឿងញៀនស្នងការខេត្តបានឱ្យដឹងថា: កាលពីវេលាម៉ោង១១:០០នាទី ថ្ងៃទី១៦ ខែតុលា ឆ្នាំ២០១៨ការិយាល័យប្រឆាំងបទល្មើសគ្រឿងញៀន បានបង្ក្រាបករណីជួញដូរ និងប្រើប្រាស់នូវសារធាតុញៀនខុសច្បាប់មួយកន្លែងស្ថិតនៅផ្លូវលំតាមផ្ទះសំណាក់ត្បួងកណ្តៀង ក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
មន្ត្រីជំនាញនគរបាលប្រឆាំងបទល្មើសគ្រឿងញៀនស្នងការខេត្តបានបន្តថា: ក្នុងករណីខាងលើកម្លាំងជំនាញឃាត់ខ្លួនបានជនសង្ស័យ០១នាក់ ឈ្មោះ លឹម ប៊ុនស្រឿន ភេទប្រុស អាយុ ២៩ឆ្នាំ មុខរបរ មិនពិតប្រាកដ បច្ចុប្បន្នរស់នៅភូមិវាលវង់ សង្កាត់ទួលល្វា ក្រុងប៉ៃលិន ខេត្តប៉ៃលិន ។
ដកហូតវត្ថុតាងបានដូចជា៖ ម្សៅក្រាមពណ៌សថ្លា (ម៉ាទឹកកក ICE) ចំនួន ០១កញ្ចប់តូច ទំងន់ស្មើនឹង ១,៣១ក្រាមថ្លឹងទាំងថង់ប្លាស្ទិក ។ ថ្នាំញៀនប្រភេទគ្រាប់អក្សរ WY ព៌ណក្បឿងចំនួន ០១គ្រាប់ ។ ជញ្ជឹងសម្រាប់ថ្លឹងចំនួន ០១គ្រឿង ។
បច្ចុប្បន្នករណីខាងលើកម្លាំងជំនាញការិយាល័យប្រឆាំងបទល្មើសគ្រឿងញៀនកំពុងកសាងសំណុំរឿងចាត់ការទៅតាមនីតិវិធី ៕ ស សារ៉េត
