បុរសចំណាស់ម្នាក់មិនស្គាល់អត្តសញ្ញាណ ត្រូវរថយន្ដសាំយ៉ុងបុកស្លាប់ ខណៈកំពុងជិះមូតូ

ខេត្តកំពង់ធំ៖ មានហេតុការណ៍គ្រោះថ្នាក់ចរាចរ រថយន្តបុកម៉ូតូ ក្នុងទិសដៅផ្ទុយគ្នា បណ្តាលឲបុរសចំណាស់ម្នាក់ស្លាប់កាលពីវេលាម៉ោង១៤និង៥៧នាទី ថ្ងៃទី២១ ខែតុលា ឆ្នាំ២០១៨ លើកំណាត់ផ្លូវលំក្រាលគ្រូសក្រហម ភូមិខោល ឃុំទំរីង ស្រុកសណ្តាន់ ខេត្តកំពង់ធំ ។

រថយន្តម៉ាកសាំងយ៉ុង ពណ៌ស ស្លាកលេខ ភ្នំពេញ 2AJ.7745 បើកបរដោយឈ្មោះ សូត បូរី ភេទប្រុស អាយុ២៨ឆ្នាំ នៅភូមិគោកទ្រាលិច ឃុំល្វា ស្រុកព្រៃឈរ ខេត្តកំពង់ចាម នាំខ្លួនទៅកាន់អធិការដ្ឋាននគរបាលស្រុកសណ្តាន់ ។ ម៉ូតូម៉ាកវ៉េវ ពណ៌ក្រហម ស្លាកលេខគ្មាន អ្នកបើកបរ មិនស្គាល់ឈ្មោះ និងអសយដ្ឋាន ស្លាប់នៅកន្លែងកើតហេតុ មិនពាក់មួកសុវត្ថិភាព។

មូលហេតុបង្កឡើងដោយអ្នកបើកបររថយន្ត បើកមិនប្រកាន់ស្តាំ ទៅបុកម៉ូតូដែលកំពុងចរាចរណ៍ផ្ទុយទិសដៅគ្នា។

វត្ថុតាងត្រូវសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកសណ្តាន់ ចំណែកសាកសពដំកល់ទុកនៅវត្តកំពុងតែស្វែងរកសាច់ញាតិ ៕ ប៊ុនរិទ្ធី