សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តស៊េរីទំនើបមួយគ្រឿង បើកដោយជនជាតិចិនម្នាក់ បើកបរក្នុងស្ថានភាពងងឹតមុខ រេចង្កូតឡើងចិញ្ចើមផ្លូវ បុករបងស័ង្កសីការដ្ឋានសំណង់ ដីឡូត៍លីហួរ រងការខូចខាតយ៉ាងដំណំ រីឯរថយន្តរងការខូចខាតបន្តិចបន្តួច ។
ហេតុការណ៍នេះ បានកើតឡើងកាលពីវេលាម៉ោង១១និង៣៥នាទីព្រឹក ថ្ងៃទី២៥ ខែតុលា ឆ្នាំ២០១៨ ស្ថិតនៅចំណុចរបងការដ្ឋានសំណង់ដីឡូត៍លីហួរ តាមបណ្តោយផ្លូវ៥៩៨ ភូមិទួលថ្ងាន់ សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ ។
រថយន្តស៊េរីទំនើបខាងលើ ម៉ាក BMW ពណ៌ស ពាក់ស្លាកលេខ ភ្នំពេញ 2Y -6537 បើកដោយបុរសជនជាតិចិនម្នាក់ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនកើតហេតុ គេឃើញរថយន្តខាងលើ បានបើកបរតាមបណ្តោយផ្លូវលេខ៥៩៨ ក្នុងទិសដៅពីត្បូងទៅជើង ខណៈមកដល់ចំណុចកើតហេតុ អ្នកបើកបរមានស្ថានភាពងងឹតមុខ ក៏រេចង្កូតឡើងខឿនចិញ្ចើមផ្លូវ ខាងស្តាំដៃបុករបងសង្ក័សី ការដ្ឋានសំណង់ខាងលើ បណ្តាលឲ្យរងការខូចខាតតែម្តង ។
ក្រោយកើត ភាគីខាងតំណាងរថយន្តបានសម្របសម្រួលជាមួយតំណាងការដ្ឋានសំណង់ សងថ្លៃខូចខាតចំនួន៥០០ដុល្លារ ដើម្បីបញ្ចប់រឿង នៅកន្លែងកើតហេតុ ៕ អរុណរះ
