សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សន្តិសុខយាមនៅការដ្ឋានសំណង់អគារ៩៩៩ ម្នាក់ត្រូវកម្លាំងសមត្ថកិច្ចនគរបាលប៉ុស្តិ៍ទឹកថ្លាឃាត់ខ្លួន ករណីអំពើលួច (លួចយកស៊ីម៉ង់ត៍)ក្នុងក្រុមហ៊ុន ។ ការឃាត់ខ្លួនជនសង្ស័យខាងលើ បន្ទាប់ពីទទួលពាក្យបណ្តឹងពីជនរងគ្រោះកាលពីថ្ងៃទី២ខែ វិច្ឆិកា ឆ្នាំ២០១៨ វេលាម៉ោង ១៦ និង០០នាទី នៅចំណុចក្នុងការដ្ឋានសំណង់អគារ៩៩៩ ផ្លុវបេតុង ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
នគរបាលប្រាប់ថា៖ ជនសង្ស័យ ឈ្មោះ អ៊ាម រដ្ឋា ភេទប្រុស អាយុ២២ឆ្នាំ ជនជាតិខ្មែរ មុខរបរសន្តិសុខយាមនៅការដ្ឋានសំណង់អគារ៩៩៩ ស្នាក់នៅក្នុងការដ្ឋានសំណង់៩៩៩ ផ្លុវបេតុង ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ (គ្មានសារធាតុញៀន) ។
ដោយឡែកជនរងគ្រោះឈ្មោះ កៅ សីហា ភេទប្រុស អាយុ៣៣ឆ្នាំ ជនជាតិខ្មែរ មុខរបរមេធាវី និងតំណាងក្រុមហ៊ុន ៩៩៩ ស្នាក់នៅផ្ទះលេខ A១៣ ផ្លុវ២៣បេ ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ ។ សម្ភារបាត់បង់ ៖ ដែកចំនួន១១តោន , ឥដ្ឋការ៉ូចំនួន៣២០ម៉ែត្រការ៉េ និងស៊ីម៉ង់ត៍ ចំនួន១២តោន ។
ប្រភពពីសមត្ថកិច្ចបានឲ្យ មុនពេលកើតហេតុ ដោយមានការបាត់បង់សម្ភារសំណង់ក្រុមហ៊ុន រួចជនរងគ្រោះបានបើកកាម៉េរ៉ាសុវត្ថិភាពរបស់ក្រុមហ៊ុនក្នុងបុរី ៩៩៩ ចំណុចកើតហេតុខាងលើមើល ឃើញសកម្មភាពរបស់ជនសង្ស័យ លួចយកសម្ភារសំណង់របស់ក្រុមហ៊ុន បន្ទាប់មកជនរងគ្រោះបាននាំគ្នាឃាត់ខ្លួនជនសង្ស័យប្រគល់ឲ្យសមត្ថកិច្ចប៉ុស្តិ៍ទឹកថ្លាសាកសួរ ហើយជនរងគ្រោះបានដាក់ពាក្យបណ្តឹងចោទប្រកាន់ជនសង្ស័យតែម្តង ៕ តុង សីហា
