សារព័ត៌មាន នគរវត្ត តែងតែនាំមុខគេជានិច្ច
កោះកុង៖ មិនកោតសរសើរមិនបានសម្រាប់ទឹកចិត្តរបស់តារាចម្រៀង និងកំប្លែង នាយ 4G និងក្រុមការងារ ដែលបានពុះពារធ្វើដំណើរពីភ្នំពេញទៅកាន់ទឹកដីនៃតំបន់អារ៉ែង ដែលជាតំបន់ដាច់ស្រយាលដើម្បី ចែកអំណោយដល់សិស្សានុសិស្ស ដែលមានជីវភាពក្រីក្រ និងលោកគ្រូ អ្នកគ្រូ ដែលកំពុងបង្រៀN នៅសាលាបឋមសិក្សាចំនួន៣ នាតំបន់នោះ ។
ទោះបីជាត្រូវឆ្លងកាត់ការលំបាកជាច្រើនតាមរយៈការធ្វើដំណើរតាមផ្លូវរាប់រយគីឡូម៉ែត្រក្តីក៏ នាយ 4G និងក្រុមសប្បុរសជនមួយក្រុមបានធ្វើដំណើរទៅដល់គោលដៅពោលគឺតំបន់ព្រៃភ្នំដ៏ល្បីនៅកម្ពុជា គឺតំបន់អារ៉ែង នៃស្រុកថ្មបាំង ខេត្តកោះកុង ។ នាយ 4G បានបញ្ជាក់ថា នេះគឺជាកម្មវិធីសិល្បៈនៃការចែករំលែកដែលបានបង្កើតឡើងដោយក្រុមហ៊ុនខុនសណ្តាប់KSD ពុះដីឡូតិ៍ និងផ្ទះល្វែង ។ លោកបញ្ជាក់បន្ថែមថា ជាទឹកចិត្តអាណិតស្រឡាញ់ក្មេង និងគោរពលោកគ្រូអ្នកគ្រូដែលបានលះបង់ក្នុងការបង្រៀនពួកគាត់ ទោះជាលំបាកបន្តិចក៏នៅតែជម្នះ ។
លោកបញ្ជាក់ថាតំបន់ខ្លះកំថាឡើយឡានម៉ូតូជិះទៅដល់សូម្បីតែដើរដំណើរដោយជើងក៏ពិបាក និងមានភ្លៀងផងក៏ដោយ ។ លោកថាថ្នាក់ដឹកនាំក្រុមហ៊ុន និងបុគ្គលិកជិត៣០នាក់ បានធ្វើដំណើរទៅកាន់ទឹកនដីនោះដោយផ្ទាល់ដើម្បីចែកជាសម្ភារៈសិក្សាដល់ប្អូនៗ និងផ្តល់ជាគ្រឿងឧភោគបរិភោគ និងថវិការលោកគ្រូអ្នកគ្រូក្នុងម្នាក់ៗ៤០ម៉ឺនរៀលផងដែរ ។
លោកថាជាដើមឆ្នាំសិក្សាថ្មីទើបជួយសម្រួលដល់ពួកគាត់ខ្លះ ដែលសរុបនៃការចំណាយគឺប្រមាណជាង១ម៉ឺនដុល្លារអាមេរិកជាបន្ទុករបស់ក្រុមហ៊ុន និងមានការជួយចែករំលែកជួយពីក្រុមបុគ្គលិកផងដែរ ។ ទោះឆ្លងកាត់ការលំបាកក៏ក្រុមការងារថ្នាក់ដឹកនាំបានបង្ហាញពីអារម្មណ៍សប្បាយរីករាយដែលបានរួមចំណែកជួយដល់កិច្ចការងារសង្គម បើទោះបីជាចំនួនេះមិនច្រើនក៏ពិតមែន ប៉ុន្តែវាបានឆ្លុះបញ្ចាំងពីការជួយគ្នាទៅវិញទៅមក និងបណ្តុះស្មារតី និងសិល្បៈនៃការចែករំលែក ។
នាយ 4G ដែលជាបុគ្គលិកផ្នែកទីផ្សារក្នុងក្រុមហ៊ុននេះផងដែរ បានបញ្ជាក់ថា កន្លងមកថ្នាក់ដឹកនាំ និងបុគ្គលិកក៏ធ្លាប់ធ្វើសកម្មភាពសប្បុរសធម៌បែបនេះ នៅលើទឹកដីនៃខេត្តក្រចេះផងដែរ ហើយគឺជាសកម្មភាពចុះផ្ទាល់ សួរសុខទុក្ខ ចែករំលែកក្តីស្រឡាញ់ចំពោះក្មេងៗ ។
ក្នុងពេលដ៏ខ្លីខាងមុខនេះ ក្រុមហ៊ុននឹងបន្តចេញទៅសាលាបឋមសិក្សាមួយនៅខេត្តក្រចេះនោះជាថ្មីក្រោយពីមើលឃើញពីភាពខ្វះខាតសម្ភារៈសិក្សា អណ្តូងទឹកនៅសាលាមួយនោះ ។ លោករំពឹងថា ការចែកក្តីស្រឡាញ់ ថវិកានេះនឹងក្លាយជាទៅជាកម្លាំងចិត្តសម្រាប់ប្អូនៗបន្តការខិតខំតស៊ូសិក្សារៀនសូត្រ និងបន្តយកចំណេះដឹងនោះជួយខ្លួនឯង គ្រួសារ និងសង្គមជាតិនៅថ្ងៃអនាគត៕ វឌ្ឍនា
