កំពូលជើងឯក TV5 ៖ វ៉ាន់ វឿន និងអេ រដ្ឋា ដណ្តើមបានកៅអី​ហើយ

ភ្នំពេញ៖ កីឡាករ វ៉ាន់ វឿន និង អេ រដ្ឋា បានប្រកួតឈ្នះកៅ​អី ​ កាលពីល្ងាចថ្ងៃទី៣ ខែវិច្ឆិកា ឆ្នាំ២០១៨ នៅលើសង្វៀន​ប្រដាល់ប៉ុស្តិ៍លេខ៥ ដែលជាការប្រកួតវគ្គជម្រុះទី១ ជុំទី​២ ប្រភេទទម្ងន់៥៧គីឡូក្រាម ដើម្បីដណ្តើម​ពានរង្វាន់​ ៤ពាន់ដុល្លារ ក្លាយជាជើងឯក នៃខ្សែក្រវាត់កំពូលជើងឯក​ TV5 ។

អេ រដ្ឋា មកពីក្លិប​ អេភូថងកីឡា ប្រកួត​៣ទឹក ត្រូវចៅក្រម៥រូប សម្រេចសេចក្តីឲ្យឈ្នះពិន្ទុលើកីឡាករ​ ង៉ែត វុធ មកពីក្លិបកងពលតូចទ័ពពិសេស​ឆ័ត្រយោង៩១១ ។ ង៉ែត វុធ ទម្ងន់៥៧គីឡូក្រាមដូចគ្នា បានភ្លាត់ស្នៀត​មួយពេល ក៏ត្រូវ​គូប្រកួតដាក់មួយខ្នាយចំចុងភ្នែកខាងឆ្វេង បណ្តាលឲ្យហូរឈាមកក្លាក្ស ។

រីឯ​​ វ៉ាន់ វឿន ម្ចាស់មេដាយសំរិទ្ធស៊ីហ្គេម នៅម៉ាឡេស៊ី មកពីក្លិបឃ្លាំងមឿងកីឡា ខេត្តពោធិសាត់ វិញ ក៏មិនធម្មតាដែរ ក្បាច់គុនរបស់គេ​​ពេញខ្លួន ធ្វើឲ្យដៃគូនៅលើសង្វៀន គឺ ភួន ពិសិដ្ឋ មកពីក្លិប​រាជសីហ៍ ខេត្តរតនគិរី មិនអាចតស៊ូបាន ក៏ដួលសន្លប់ស្តូក​ស្តឹងភ្លាមៗ ត្រូវអាជ្ញាកណ្តាលរាប់​ដល់ដប់ហើយ នៅតែមិនអាចក្រោកឡើង ដើម្បីបន្តការប្រកួតទៀតបាន ក៏ចុះចាញ់​ វ៉ាន់ វឿន នៅក្នុងទឹកទី១នោះតែម្តងទៅ ។

ដោយឡែក សម្រាប់គូពិសេស​ ចេង គា ទម្ងន់​៦៣.៥គីឡូក្រាម​ មកពីក្លិ​ប​ វិបុលដារិទ្ធិ ខណ្ឌពោធិសែនជ័យ ប្រកួតរយៈពេល៥ទឹក ​នៅលើសង្វៀន បានយកឈ្នះដោយពិន្ទុទៅលើកីឡាករ ង៉ែត រដ្ឋា មកពីក្លិបតាព្រហ្មមានជ័យ គូពិសេសចុងក្រោយ ជាគូសងសឹកគ្នាផងដែរនោះ គឺ កីឡាករ សាន សំអុន ប្រភេទទម្ងន់៥៧គីឡូក្រាម មកពីក្លិប​អារុណរះកីឡា ដែលប្រកួតលើកមុន ធ្លាប់តែស្មើពិន្ទុជាមួយកីឡាករ លាង ភារម្យ មកពីក្លិប ម៉ៃទីក្រាំងយ៉ូវ ពេលនេះ គេបានសម្រេចបំណងប្រាថ្នាហើយ គឺចៅក្រម​ទាំង៥រូប សម្រេចដាក់ពិន្ទុទាំងប្រាំទឹក ឲ្យគេឈ្នះកីឡាករ លាង ភារម្យដោយពិន្ទុ ។

ដោយឡែក គូអន្តរជាតិវិញ ប្រភេទទម្ងន់៧១គីឡូក្រាម ឯម ឡេងលី មកពីក្លិប ថ្មគោលខណ្ឌពោធិសែនជ័យ បានវាយឲ្យសន្លប់ក្នុងទឹកទី១ កីឡាករថៃ ឃុន ផែន ។ កីឡាករថៃ រូបនេះ មិនដឹងថា ភ្លាត់ស្នៀត​យ៉ាងម៉េចនោះទេ បណ្តោយឲ្យ ឯម ឡេងលី ជង្គង់យក៍ៗ រហូតដល់សន្លប់បាត់ឈឹង ដេកស្តូកនៅលើរេញក្រោមក្រសែភ្នែក​អ្នកទស្សនាយ៉ាងច្រើនសន្ធឹក ។

សូមបញ្ជាក់ថា សហព័ន្ធកីឡាប្រដាល់គុនខ្មែរ ដែលលោកឧត្តមសេនីយ៍ឯក តែម ម៉ឺន ជាប្រធានគណៈកម្មការរៀបចំការប្រកួតនោះ បានសម្រិតសម្រាំងកីឡាករជើងខ្លាំង៣២រូប ក្នុងប្រភេទទម្ងន់​​៥៧គីឡូក្រាម ឲ្យចូលខ្លួនមកប្រកួតនៅលើសង្វៀង ស្ទូឌីយូ ប៉ុស្តិ៍លេខ៥ ភូមិព្រែកថ្លឹង ដើម្បីដណ្តើម​ពានរង្វាន់ជើងឯក TV5 Boxing Knock Out Series K-Cement ដូចដែលធ្លាប់កើតមានដូចឹ្នងដែរ ក្នុង៣រដូវកាលមុនៗ ។ នេះគឺជាការប្រកួតរដូវកាលទី៤ ដែលចាប់ផ្តើមបើកឆាក​វគ្គជម្រុះទី១ ជុំទី១ កាលពីថ្ងៃទី២៧ ខែតុលា ឆ្នាំ២០១៨ ដែលកាលណោះ ឆាយ មាស របស់ក្លិបសំរោងកោងកីឡា ខេត្តបាត់ដំបង ឈ្នះ ងួន គា មកពីក្លិប តាលីដំរីមានរិទ្ធ ហើយបឺត សង្ឃឹម មកពីក្លិប រ៉ាហាប់ស្វាយប៉ាក ឈ្នះកៅអី​កីឡាករ សយ សី មកពីក្លិប​វិបុលដារិទ្ធិខណ្ឌពោធិ៍សែនជ័យ ។ លុះចូលមកដល់វគ្គជម្រុះទី១ ជុំទី២ នាថ្ងៃទី៣ ខែវិច្ឆិកា ឆ្នាំ២០១៨ សម្រាប់គូ​ពានរង្វាន់ កីឡាករ វ៉ាន់ វឿន និងកីឡាករ អេ រដ្ឋា គឺជាអ្នកដណ្តើមបានកៅអីហើយ ៕ ស តារា