សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កក្រើកនៅខណ្ឌច្បារអំពៅ និងពាសពេញបណ្តាញទំនាក់ទំនងសង្គមហ្វេសប៊ុកតែម្តងនៅថ្ងៃទី៣ ខែវិច្ឆិកា ឆ្នាំ២០១៨នេះ ខណៈដែលស្ត្រីម្នាក់ជាមេតុងតីន បោកប្រាស់លុយកូនតុងតីន រហូតដល់ជាង៣លានដុល្លារហើយ រត់គេចខ្លួនបាត់ពីផ្ទះតែម្តង ។
ប្រភពរាយការណ៍ថា កូនតុងតីន មានទាំងរាស្ត្រតូចតាច ជាអាជីវករ ជាមន្ត្រី នាំគ្នាស្រែកទ្រហ៊ោយំ អំពាវនាវរកកិច្ចអន្តរាគមន៍ពីសមត្ថកិច្ច ហើយជាពិសេសថែមទៀតនោះ ជនដែលត្រូវចាញ់បោកមេតុងតីនម្នាក់នេះដែរនោះ ត្រូវគេដឹងថា មានរួមបញ្ចូលទាំងអតីតចៅហ្វាយក្រុង និងលោកឧកញ៉ាផងដែរ ។
ប្រភពរាយការណ៍បឋមថា មេតុងតីនជើងឆើតរូបនេះបានប្រមូលលុយជាង៣លានដុល្លារ ហើយនាំកូនៗរបស់ខ្លួនរត់បាត់ចេញពីផ្ទះកាលពី៣ទៅ៤ថ្ងៃមុនមកម្ល៉េះ ហើយទើបតែភ្ញាក់ផ្អើល បែកខ្ចាយដំណឹងនេះដល់កូនៗតុងតីនថ្ងៃនេះប៉ុណ្ណោះ ។
អាជ្ញាធរមានសមត្ថកិច្ចខណ្ឌច្បារអំពៅ នាពេលនេះបាននិងកំពុងពិនិត្យ និងស៊ើបសួរពាក់ព័ន្ធករណីនេះ ហើយអាចឈានដល់ឃាត់ខ្លួនជនសង្ស័យឆបោកជាមេតុងតីន នាំខ្លួនមកផ្តន្ទាទោសតាមច្បាប់ ៕
