សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ករណីគ្រោះថ្នាក់ចរាចរណ៍មួយបានកើតឡើង ដោយសារតែរថយន្តហ៊ីយ៉ាន់ដាយស៊េរីទំនើបមួយគ្រឿង បើកបរដោយបុរសម្នាក់ ក្នុងល្បឿនលឿន លុះដល់ចំណុចផ្លូវកោងមិនប្រយ័ត្ន ក៏បានបុកខឿនផ្លូវ គងជាប់ពីលើបណ្តាលឲ្យខូចខាតយ៉ាងដំណំ តែមិនបង្កឲ្យមនុស្សរងរបួសនោះទេ ។
ហេតុការណ៍នេះ បានកើតឡើងកាលពីវេលាម៉ោង១និង៤៥នាទីរសៀលថ្ងៃសុក្រ ២កើត ខែកត្តិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៩ ខែវិច្ឆិកា ឆ្នាំ២០១៨ តាមបណ្តោយផ្លូវR8 អតីតប្លុកបឹងកក់ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
រថយន្តបង្កម៉ាកហ៊ីយ៉ាន់ដាយស៊េរីទំនើបមួយគ្រឿង ពណ៍ស ពាក់ស្លាកលេខ ភ្នំពេញ2AP-7997 បើកបរដោយបុរសម្នាក់ មិនស្គាល់អត្តសញ្ញណ ក្រោយកើតហេតុគេចខ្លួនបាត់ ។
តាមប្រភពព័ត៍មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុគេឃើញបុរសជនជាតិខ្មែរម្នាក់ បានបើករថយន្តបង្កតាមផ្លូវលេខR៨ ក្នុងល្បឿនលឿន ពីត្បូងមកជើង ដល់ផ្លូវកោង ក៏បានបុកខឿនផ្លូវ គងជាប់ពីលើបណ្តាលឲ្យរងការខូចខាតយ៉ាងដំណំ ហើយអ្នកបើកបរបានចុះរត់គេចខ្លួនបាត់ស្រមោលតែម្តង ដោយបន្សល់ទុករថយន្តបង្កនៅកន្លែងកើតហេតុ ។
ក្រោយកើតហេតុសមត្ថកិច្ចមូលដ្ឋាន បានទំនាក់ទំនងជាមួយសមត្ថកិច្ចជំនាញរួចធ្វើការវាស់វែងយករថយន្តទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរង់ចាំដោះស្រាយគ្នាទៅតាមច្បាប់ ៕ ស តារា
