សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ គណបក្សសង្គ្រោះជាតិ ដែលត្រូវតុលាការកំពូលរំលាយចោល ទាមទារឱ្យទណ្ឌិតសម រង្ស៊ី សុំទោសលោកកឹម សុខា និង អ្នកគាំទ្រគណបក្សទាំងអស់ជាដាច់ខាត ។
សេចក្ដីថ្លែងការណ៍ អតីតគណបក្សសង្គ្រោះជាតិ នៅថ្ងៃទី១០ ខែវិច្ឆិកា ឆ្នាំ២០១៨ នេះ សរសេរថា គណបក្សសង្គ្រោះជាតិ ពិតជាមានការខកចិត្តយ៉ាងខ្លាំង ដែលលោកសម រង្ស៊ី តាមរយៈហ្វេសប៊ុករបស់ខ្លួន កាលពីថ្ងៃទី៩ ខែវិច្ឆិកា ឆ្នាំ២០១៨ បានយកករណីលោកប្រធានកឹម សុខា ជាកម្មវត្ថុនៃការបបួលលោកនាយករដ្ឋមន្ត្រី ហ៊ុន សែន ភ្នាល់នយោបាយ ថា ដោះលែង ឬ មិនដោះលែង កឹម សុខា ។
សេចក្ដីថ្លែងការណ៍ ដដែល បន្តថា គណបក្សសង្គ្រោះជាតិ ចាត់ទុកថា ទង្វើនេះ គឺ ពិតជាអសីលធម៌ជាទីបំផុតដែលបានប្រព្រឹត្តចំពោះលោកប្រធាន កឹម សុខា ដែលទទួលរងនូវការចោទប្រកាន់ពីអំពើក្បត់ជាតិទាំងអយុត្តិធម៌រួចមកហើយ ឥឡូវនេះទទួលរងនូវការប្រមាថលើកិត្តិយសនិងអាយុជីវិតរបស់លោកថែមទៀត ។
ករណីនេះ គណបក្សសង្គ្រោះជាតិ មិនអាចទទួលយកបានឡើយ ហើយចាំបាច់ទាមទារឱ្យលោក សម រង្ស៊ី ត្រូវធ្វើការសុំទោសលោកប្រធាន កឹម សុខា និង អ្នកគាំទ្រគណបក្សសង្គ្រោះជាតិ ទាំងអស់ជាដាច់ខាត ។ បើពុំនោះទេ គណបក្សសង្គ្រោះជាតិ ក្នុងនាមលោកប្រធាន កឹម សុខា នឹងចាត់វិធានការផ្លូវច្បាប់ចំពោះលោកសម រង្ស៊ី ។
គណបក្សសង្គ្រោះជាតិ យល់ឃើញថា ការយកលោកប្រធានកឹម សុខា មកភ្នាល់នយោបាយនេះ គឺ ជាល្បិចកលទុច្ចរិតរបស់លោកសម រង្ស៊ី ដែលគ្រោងនឹងដឹកនាំធ្វើសន្និបាតពិភពលោកគណបក្សសង្គ្រោះជាតិ នាដើមខែធ្នូ ខាងមុខ ដើម្បីបង្ខិតបង្ខំ និង សងសឹកចំពោះក្រុមអ្នកស្មោះស្ម័គ្រនយោបាយជាមួយលោកប្រធានកឹម សុខា ដែលប្រឆាំងនឹងការធ្វើបក្សប្រហារមួយនេះ ។
គណបក្សសង្គ្រោះជាតិ សូមអំពាវនាវដល់លោកសម រង្ស៊ី និង ចលនាសង្គ្រោះជាតិរបស់លោក ឱ្យបញ្ឈប់ជាបន្ទាន់នូវផែនការបក្សប្រហារមួយនេះ ។
សូមបញ្ជាក់ថា សម្តេចតេជោហ៊ុន សែន នាយករដ្ឋមន្ត្រីនៃកម្ពុជា ប្រកាសតាមបណ្ដាញសារព័ត៌មានក្នុងស្រុកថា សម្តេចសុខចិត្តភ្នាល់គ្នាជាមួយទណ្ឌិតសម រង្ស៊ី លើករណីការដោះលែងលោក កឹម សុខា ហើយការភ្នាល់នេះ “បើសិនមានការដោះលែង កឹម សុខា នៅថ្ងៃទី២៩ ខែធ្នូ ឆ្នាំ២០១៨ ឬ យ៉ាងយូរថ្ងៃទី៣ ខែមីនា ឆ្នាំ២០១៩ខាងមុខនេះមែន , សម្តេចតេជោ នឹងចុះចេញពីតំណែង តែបើមិនមានការដោះលែងទេ នោះ សម រង្ស៊ី នឹងត្រូវចូលឱ្យចាប់ខ្លួន “។
ការសម្រចរបស់សម្តេចតេជោ គឺ ដើម្បីឆ្លើយតបនឹងសាររបស់ទណ្ឌិតសម រង្ស៊ី ដែលកំពុងនិរទេសខ្លួននៅក្រៅប្រទេស ។
ទណ្ឌិត សម រង្ស៊ី នៅថ្ងៃទី៩ ខែវិច្ឆិកា ឆ្នាំ២០១៨ សរសេរតាមបណ្ដាញសង្គមហ្វេសប៊ុក យ៉ាងដូច្នេះថា ៖
តើលោក ហ៊ុន សែន ហ៊ានភ្នាល់ជាមួយខ្ញុំទេ?
កាលពីថ្ងៃ ០៧ វិច្ឆិកា កន្លងទៅនេះ លោក ហ៊ុន សែន បានអះអាងថា គាត់មិនងាយដោះលែងលោក កឹម សុខា ទេ ទាល់តែចាំសេះដុះស្នែង។
ខ្ញុំនៅតែជឿជាក់ថា ក្រោមសម្ពាធអន្តរជាតិ លោក ហ៊ុន សែន នឹងត្រូវបង្ខំចិត្តដោះលែងលោក កឹម សុខា ក្នុងពេលឆាប់ៗ ខាងមុខនេះ។ អាចថ្ងៃ ២៩ ធ្នូ ២០១៨ នេះ ឬក៏ យ៉ាងយូរបំផុត ថ្ងៃ ០៣ មីនា ២០១៩។
បើលោក ហ៊ុន សែន ចាញ់ខ្ញុំ ក្នុងការភ្នាល់នេះ គាត់មិនចាំបាច់កាត់កខ្លួនឯង ដូចក្នុងការសន្យាបញ្ឈប់ការកាប់ព្រៃឈើ នោះទេ។ ខ្ញុំគ្រាន់តែសុំឲ្យគាត់ចុះចេញពីតំណែង បានហើយ។ តែបើខ្ញុំចាញ់លោក ហ៊ុន សែន វិញ ខ្ញុំសុខចិត្តដើរចូលឲ្យគាត់ចាប់ខ្ញុំ យកទៅឃុំទន្ទឹមនឹងលោក កឹម សុខា បើមិនបញ្ចូលរឿងអ្វីថ្មី (ដូចជារដ្ឋប្រហារ) ក្រៅពីចំណុចដែលបានលើកឡើងខាងលើនេះ។
សម្តេចតេជោ ហ៊ុន សែន បានប្រកាសតាមរយៈបណ្តាញព័ត៌មាន ដដែល ដោយសម្តេចបានសម្រេចភ្នាល់តាមការបបួលរបស់លោក សម រង្ស៊ី ហើយ។ សម្តេចតេជោ បានកំណត់ថា ប្រសិន សម រង្ស៊ី ចាញ់ត្រូវចូលឱ្យចាប់ខ្លួនភ្លាមៗតែម្តង បន្ទាប់ពីបញ្ចប់ការភ្នាល់៕ ចេស្តា
