សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ សម្តេចតេជោហ៊ុន សែន នាយករដ្ឋមន្ត្រីនៃកម្ពុជាបានថ្លែងនៅលើបណ្តាញសង្គមហ្វេសប៊ុកយ៉ាងដូច្នេះថា ៖
«ថ្ងៃនេះ ខ្ញុំបានឃើញវីដេអូមួយ ដែលគេបានបង្ហោះតាម YouTube អំពី ជនពាលសម រង្សីដែលបានសរសេរក្នុង Facebook បបួលខ្ញុំភ្នាល់អំពីការដោះលែង កឹម សុខា។ ការបកស្រាយក្នុងវីដេអូឃ្លីបនេះគឺបានបង្ហាញនូវហេតុផលត្រឹមត្រូវខាងផ្លូវច្បាប់ដែលខ្ញុំបាននិយាយទាក់ទងជាមួយដែនសមត្ថកិច្ចរបស់នាយករដ្ឋមន្ត្រីដែលគ្មានចំណុចណាមួយបំពានដល់សមត្ថកិច្ចរបស់តុលាការទាល់តែសោះ។ នាយករដ្ឋមន្ត្រីពុំមានសិទ្ធស្នើសុំលើកលែងទោសអោយអ្នកដែលមិនទាន់បានកាត់ទោសឬសាលក្រមមិនទាន់ចូលស្ថាពរនោះទេ(ទោះសេះដុះស្នែងក៏មិនកើតឡើងទេ)។
យោងតាមច្បាប់ជាធរមានទោះ១០០០ឆ្នាំទៀតក៍មិនអាចកើតបានដែរកុំថាឡើយត្រឹមសេះដុះស្នែង។ តែមនុស្សដែលចូលចិត្តវាយប្រហារខ្ញុំគេអត់ចេះស្តាប់និងសិក្សាពីសំដីដែលបង្កប់ដោយន័យនយោបាយនិងផ្លូវច្បាប់ដែលខ្ញុំបាននិយាយនោះទេដូចនេះទើបគេរៀបអន្ទាក់ដាក់ខ្ញុំ ពេលនេះគេដើរជាន់អន្ទាក់ខ្លួនឯងហើយ។ ដោយសារការភ្នាល់លើកនេះជាការភ្នាល់ដាក់ជិវិតនយោបាយដែលអ្នកបបួលខ្ញុំភ្នាល់គឺជាជនពាលខាងនយោបាយដូចនេះតម្រូវអោយខ្ញុំត្រូវមានភស្តុតាងនិងសូមស្នើអោយមេធាវីខ្ញុំរក្សាទុកភស្តុតាងនេះតាមផ្លូវច្បាប់។
វីដេអូឃ្លីបនេះ ខ្ញុំនឹងបង្ហោះក្នុង Facebook ខ្ញុំរហូតដល់ថ្ងៃទី ៣ ខែមិនា ឆ្នាំ២០១៩ ហើយនៅពេលនោះតើនឹងមានអ្វីកើតឡើងដូចដែលជនពាលនេះបានបបួលខ្ញុំភ្នាល់នៅក្នុង Facebook គាត់មែនឬអត់»៕
