សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ មនុស្ស២នាក់របួសធ្ងន់ និង២នាក់ទៀតរបួសស្រាល ក្នុងហេតុការណ៍គ្រោះថ្នាក់ចរាចរណ៍មួយរវាងម៉ូតូបុកម៉ូតូពេញមួយទំហឹង កាលពីវេលាម៉ោង១៨និង២០នាទី ថ្ងៃទី២៣ ខែវិច្ឆិកា ឆ្នាំ២០១៨ ស្ថិតក្នុងភូមិអរិយក្សត្រ ឃុំអរិយក្សត្រ ស្រុកល្វាឯម ខេត្តកណ្តាល ។
មន្ត្រីនគរបាលចរាចរណ៍ស្រុកល្វាឯមបានឲ្យដឹងថា ម៉ូតូបង្កម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៧ ពាក់ស្លាកលេខ កណ្តាល 1X- 5197 បើកបរដោយឈ្មោះ គេត បូរី ភេទប្រុស អាយុ២៦ឆ្នាំ មុខរបរ ជាងផ្សារដែក(របួសធ្ងន់) មានទីលំនៅភូមិក្រើល ឃុំអន្សោង ស្រុក កំពង់ត្របែក ខេត្តព្រៃវែង មានអ្នករួមដំណើរ២នាក់ ទី១.ឈ្មោះ ជៀប សូនី ភេទ ប្រុស អាយុ១៨ឆ្នាំ មុខជាងផ្សារដែក (របួសស្រាល) មានទីលំនៅភូមិព្រែកជ្រូក ឃុំបាក់ដាវ ស្រុកខ្សាច់កណ្តាល ខេត្តកណ្តាល ទី២.ឈ្មោះ សៅ សុង ភេទប្រុស អាយុ១៧ឆ្នាំ មុខរបរ ជាងផ្សារដែក (របួសធ្ងន់) មានទីលំនៅភូមិក្រើល ឃុំអន្សោង ស្រុកកំពុងត្របែក ខេត្តព្រៃវែង ។ ចំណែកភាគីម៉ូតូម្ខាងទៀតម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ ២០១៥ ពាក់ស្លាកលេខ ភ្នំពេញ 1CT-2397 បើកបរដោយឈ្មោះ ឡុន សុភ័ក្រ្តា ភេទប្រុស អាយុ១៥ឆ្នាំ មុខរបរ សិស្ស (របួសស្រាល) មានទីលំនៅភូមិព្រែកបង្កង ឃុំ ព្រែកតាកូវ ស្រុកខ្សាច់កណ្តាល ខេត្តកណ្តាល។
ប្រភពដដែលបន្តថា នៅមុនពេលកើតហេតុ សាក្សីបានឃើញម៉ូតូបង្កម៉ាកហុងដាឌ្រីម ពាក់ស្លាកលេខកណ្តាល 1X- 5197 ធ្វើដំណើរតាមបណ្ដោយលេខ៣៨០ ក្នុងទិសដៅពីជើងទៅត្បូង លុះមកដល់ចំណុចកើតហេតុបានរេចង្កូតទៅឆ្វេង ស្របពេលនោះក៏មានម៉ូតូមួយគ្រឿងទៀតបើកច្រាស់ទិសគ្នាបានបុកពេញមួយទំហឹង បណ្ដាលឲ្យអ្នកបើកបរម៉ូតូពាក់ស្លាកលេខកណ្តាល 1X- 5197និងអ្នករួមដំណើររងរបួសធ្ងន់២នាក់និងស្រាលម្នាក់ ។ ចំណែកអ្នកបើកបរម៉ូតូម្ខាងទៀតរងរបួសស្រាល ។
ក្រោយពីមានហេតុការណ៍កើតឡើង ជនរងគ្រោះរងរបួសធ្ងន់២នាក់ត្រូវរថយន្តសាមុយដឹកបញ្ជូនទៅសង្រ្គោះនៅមន្ទីរពេទ្យ ។ ចំណែកមធ្យោបាយពាក់ព័ន្ធទាំង២គ្រឿងត្រូវបានសមត្ថកិច្ចជំនាញចរាចរណ៍ចុះធ្វើការវាស់វែងនិងកសាងឯកសារដកហូតយកទៅរក្សាទុកនៅអធិការដ្ឋាននគរបាលស្រុកដើម្បីចាត់ការតាមច្បាប់ ៕ ស្អាងជ័យ
