សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ដែលជាតៃកុងរថយន្តកុងតឺន័រ បានរបួសបាក់ជើងម្ខាង បន្ទាប់ពីបើករថយន្តកុងតឺន័រយ៉ាងលឿនជ្រុលទៅបុកជាមួយរថយន្តហុីយ៉ាន់ដាយដឹកថ្មម៉ាត កំពុងបើកឆ្លងផ្លូវពេញទំហឹង បណ្តាលឲ្យគាបជាប់ជាមួយចង្កូតរថយន្ត ។
ក្នុងហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង២រសៀល ថ្ងៃទី២០ ខែធ្នូ ឆ្នាំ២០១៨ នៅតាមបណ្តោយផ្លូវ ២១៧ (ហៅផ្លូវចំការដូង) ស្ថិតក្នុងភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ។
បើតាមសាក្សីដែលឃើញហេតុការណ៍នេះបានរៀបរាប់ប្រាប់សមត្ថកិច្ចថា មុនពេលកើតហេតុ រថយន្តហុីយ៉ាន់ដាយ ពាក់ស្លាកលេខ ភ្នំពេញ3B-4176 បានដឹកថ្មម៉ាតពេញរថយន្តតែម្តង ដោយបើកចេញពីក្រុមហ៊ុនបំណងយកទៅចែកចាយ ហើយបានបើកឆ្លងកាត់ផ្លូវចំការដូងទិសដៅពីលិចទៅកើត ខណៈនោះស្របពេលដែលរថយន្តកុងតឺន័រ ពាក់ស្លាកលេខ ភ្នំពេញ3C-2197 បើកបរដោយបុរសម្នាក់ទិសដៅពីជើងទៅត្បូង ក្នុងល្បឿនយ៉ាងលឿន ហើយមិនប្រយ័ត្ននិងជាន់ហ្វ្រាំងមិនទាន់បានជ្រុល បុកចំហៀងចំគូទរថយន្តហុីយ៉ាន់ដាយដឹកថ្មម៉ាត យ៉ាងពេញទំហឹង បណ្តាលឲ្យក្បាលរថយន្តកុងតឺន័រកំពិតគាបជាប់បុរសជាតៃកុងតែម្តង ។
ប្រភពដដែលបានបន្តថា ភ្លាមៗកម្លាំងសមត្ថកិច្ចមូលដ្ឋានសហការជាមួយកម្លាំងនគរបាលចរាចរណ៍ខណ្ឌ រួមជាមួយបងប្អូនប្រជាការពារខណ្ឌ និងប្រជាពលរដ្ឋបានសហការគ្នាប្រមូលសម្ភារ ជួយសង្គ្រោះតៃកុងរថយន្ត ដោយយកខ្សែកាប្តិ៍ទាញត្រង់ចំណុចគាបអស់រយះពេលជាង១ម៉ោង ទើបអាចសង្គ្រោះបុរសខាងលើបាន ហើយដឹកជនរងគ្រោះបញ្ជូនទៅសង្គ្រោះនៅមន្ទីរពេទ្យភ្លាមៗតែម្តង ។
ក្រោយកើតហេតុសមត្ថកិច្ចមូលដ្ឋានបានសហការជាមួយនគរបាលជំនាញចុះសម្រួលចរាចរណ៍ជូនប្រជាពលរដ្ឋនឹងបានវាស់វែង អូសយករថយន្តទាំងពីរគ្រឿងទៅរក្សាទុកនៅការិយាល័យចរាចរផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នានៅពេលក្រោយ ៕ ភារ៉ា ដង្កោ
