សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ អ្នកជិះម៉ូតូម្នាក់បុកគោយន្តពីក្រោយពេញទំហឹងជាប់ឆ្កឹងបណ្ដាលឲ្យរងរបួសធ្ងន់ ស្ថិតក្នុងភូមិចាន់សេរី ឃុំបាក់ចិញ្ចៀន ស្រុកភ្នំក្រវាញ ខេត្តពោធិ៍សាត់ នៅលើកំណាត់ផ្លូវជាតិលេខ៥៥ ត្រង់ចន្លោះបង្គោលគីឡូម៉ែត្រលេខ២១-២២ កាលពីសុក្រ ១៣កើត ខែមិគសិរ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី២០ ខែធ្នូ ឆ្នាំ២០១៨ ។
របាយការណ៍របស់សមត្ថកិច្ចនគរបាលនៅកន្លែងកើតហេតុបានឲ្យដឹងថា៖ បុរសរងគ្រោះមាន ឈ្មោះ ខៀវ ម៉ី អាយុ ១៨ឆ្នាំ ជនជាតិខ្មែរ រស់នៅភូមិគល់ទទឹង ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់ ។
របាយការណ៍សមត្ថកិច្ចនគរបាលបន្តថា អ្នកបើកគោយន្តកន្ត្រៃ ១គ្រឿង ម៉ាគូបូតា ពណ៌ក្រហម ធ្វើដំណើរក្នុងទិសដៅពីជើងទៅត្បូង បើកបរដោយឈ្មោះ ប៉ាវ ស្រី ភេទប្រុស អាយុ ២៤ឆ្នាំ ជនជាតិខ្មែរ មុខរបរកសិករ រស់នៅភូមិសំរោង ឃុំសំរោង ស្រុកភ្នំក្រវាញ។ លុះមកដល់ចំណុចកើតហេតុគោយន្តបានឈប់នៅលើចិញ្ចើមផ្លូវ មួយសន្ទុះក្រោយមកក៍ស្រាប់តែឃើញបុរសរងគ្រោះខាងលើជិះម៉ូតូម៉ាកហុងដា(ទ្រីម)ពណ៌ខ្មៅសេរី២០១៨ បើកបរបោះពួយយ៉ាងលឿនក្នុងទិសដៅស្របគ្នា ខណៈពេលមកដល់ចំណុចកើតហេតុ ក៍បើកបុកគោយន្តពីក្រោយចូលក្រោមរទេះបណ្តាលឲ្យបុរសរងគ្រោះឈ្មោះ ខៀវ ម៉ី ខ្ទាតចេញពីម៉ូតូរបស់ខ្លួនរងរបួសយ៉ាងធ្ងន់ធ្ងរ ។
បច្ចុប្បន្ន ជនរងគ្រោះបានបញ្ជូនទៅសង្គ្រោះនៅមន្ទីរពេទ្យពោធិ៍សាត់ ចំពោះម៉ូតូនិងគោយន្តសមត្ថកិច្ចយកទៅរក្សាទុករងចាំការដោះស្រាយទៅតាមនិតិវិធីច្បាប់៕ ប៉ឹម ពិន
