សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មិនដឹងជាមានកម្មក្រាស់ ឬមានវាសនាអាក្រក់បែបណានោះទេ ដែលស្រ្តីម្នាក់បាន ជួបប្តីហេងស៊យមិនបានរៀបការពេញច្បាប់ ហើយតែងតែព្យាយាមធ្វើបាបទាំងផ្លូវចិត្តនិងផ្លូវកាយ គ្រាដែលមានកូនក្នុងពោះ៥ខែទៅហើយ បានដឹកយកនាងទៅទម្លាក់ចោលតាមផ្លូវដល់ទៅ២លើក រួចគេចខ្លួនបាត់ ព្រោះតែចង់បញ្ចៀសការទទួលខុសត្រូវក្នុងគ្រួសារ ។
ជាក់ស្តែងកាលពីវេលាម៉ោង៨យប់ថ្ងៃចន្ទ ២ រោច ខែ មិគសិរ ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៤ ខែ ធ្នូឆ្នាំ២០១៨ មានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចនគរបាលប៉ុស្តិ៏ នៅភូមិដំណាក់ធំ៣ សង្កាត់ស្ទឹងមានជ័យ ៣ ខណ្ឌមានជ័យរាធជធានីភ្នំពេញ បន្ទាប់ពីមានស្រ្តីមានផ្ទៃពោះ៥ខែម្នាក់ ត្រូវប្តីហេងស៊យ ដឹកតាមម៉ូតូយកទៅទម្លាក់ចោល នៅចំណុចខាងលើហើយគេចខ្លួនបាត់ ទុកឲ្យនាងជាប្រពន្ធដែលមិនស្គាល់ភ្នំពេញបែរមុខទៅណានោះ អត់បាយក្រហាយទឹក និងរកកន្លែងស្នាក់នៅមិនបានសម្ងំដេកក្រោមសំយាបផ្ទះគេដូចសត្វធាតុ។
គ្រាដែលប្រជាពលរដ្ឋ និងអាជ្ញាធរមូលដ្ឋានដល់កន្លែងកើតហេតុស្ត្រីខាងលើបានរៀបរាប់ប្រាប់គេឯងទាំងរលីងរលោងទឹកភ្នែកថា នាងមានឈ្មោះ រី ណា អាយុ២៥ឆ្នាំ ជនជាតិខ្មែរមុខរបរនៅផ្ទះ រស់នៅ ខេត្តកំពង់ឆ្នាំង ជាកូនកំព្រាឪពុកម្តាយ។រីឯប្តីហេងស៊យនោះមានឈ្មោះ ផេន វុត្ថា អាយុ១៩ឆ្នាំ ជនជាតិខ្មែរ រស់នៅខេត្តព្រៃវែង ធ្លាប់បួសជាលោកសង្ឃហើយសឹកភ្លាម មកស្រលាញ់នាងភ្លាម។ នាងនិងប្តីបានគ្នាជាប្តីប្រពន្ធជាង១ឆ្នាំមកហើយដោយមិនបានរៀបការត្រឹមត្រូវនោះទេ គ្រាន់តែបានសែនព្រេនតិចតួច ហើយមកដល់ពេលនេះនាងមានផ្ទៃជាង៥ខែមកហើយ ។
ស្ត្រីរងគ្រោះបានឲ្យដឹងទៀតថាកាលពីមួយខែមុនប្តីធ្លាប់យកនាងទៅបោះចោលនៅខេត្តកំពង់ធំម្តងរួមមកហើយព្រោះចង់ដោះដៃ ហើយដោយសារពេលនោះរូបគាត់បានដាក់ពាក្យបណ្តឹងនៅប៉ុស្តិ៍នគរបាល ហើយត្រូវបានសមត្ថកិច្ចហៅប្តីមកអប់រំយ៉ាងយូរទើបព្រមទទួលយកនាងធ្វើជាប្រពន្ធវិញរួចយកនាងទៅរស់នៅខាងប្តីឯខេត្តព្រៃវែងខណៈដែលរូបនាង បានដកពាក្យបណ្តឹងវិញនោះ។លុះមកដល់ថ្ងៃទី២០ខែធ្នូឆ្នាំ២០១៨ប្តីបានលួងលោមនាងថាមកភ្នំពេញដើម្បីរកការងារធ្វើទាំងពីរនាក់ តែពេលមកដល់ភ្នំពេញបាននាំគ្នាទៅដេកនៅផ្ទះសំណាក់មួយអស់រយៈពេល៣ថ្ងៃមកហើយតែរកការងារធ្វើមិនទាន់បានទេ។
ស្រ្តីរូបនេះបន្តថា មកដល់ថ្ងៃចន្ទទី២៤ធ្នូជាថ្ងៃកើតហេតុនេះ ស្រាប់តែប្តីចិត្តអប្រិយ៏បានដឹក យករូបនាងមកទម្លាក់ចោលនៅផ្លូវវែងស្រេង កែងនិងផ្លូវចូលផ្សារដីថ្មី។ នៅម៉ោង៨យប់ដោយបាត់ប្តីយូរមិនឃើញមកវិញគាត់បានទូរស័ព្ទទៅរកប្តីតែមិនចូលសង្ស័យបិតទូរស័ព្ទរួចហើយរូបគាត់បានទូរស័ព្ទទៅបងថ្លៃនៅខេត្តព្រៃវែងបែរជាបងថ្លៃឆ្លើយមកវិញថាមិនស្គាល់នាងទេហើយថែមគំរាមថាឲ្យឈប់ទូរស័ព្ទទៅគេទៀត ប្រយ័ត្នមានបញ្ហា ។
ក្រោយមកអាជ្ញាធរមូលដ្ឋានបានទំនាក់ទំនងទៅថ្នាក់លើ តែពេលនោះមានបុរសចិត្តល្អម្នាក់បានស្ម័គ្រចិត្តដឹកស្ត្រីរងគ្រោះរូបនេះយកទៅឲ្យស្នាក់នៅក្នុងស្ថានីយ៍វិទ្យុក្នុងស្រុកមួយដើម្បីជួយមើលថែមួយរយៈសិន ទម្រាំស្រាវជ្រាវរកប្តីហេងស៊យរបស់គាត់ឃើញមកទទួលយក នាងវិលត្រឡប់ទៅស្រុកកំណើតវិញ ៕ ប្រាថ្នា
