រថយន្តបុក​បង្គោល​ភ្លើង​បាក់​មួយ​ដើមនៅមុខវត្តនិរោធ

ភ្នំពេញ រថយន្តមួយគ្រឿងបើកលឿនជ្រុលទៅបុកបង្គោលបំភ្លឺផ្លូវបាក់រៀបដល់ដី ហើយរថយន្តកល់លើទ្រូងផ្លូវជាប់ទៅមុខលែងរួច។

ហេតុ​ការណ៍នេះបានកើតឡើងនៅម៉ោង១រំលងអធ្រាត្រឈានចូលថ្ងៃទី២៩ ខែធ្នូ ឆ្នាំ២០១៨ស្ថិតតាមបណ្ដោយផ្លូវជាតិលេខ១ ខាងមុខវត្តនិរោធ ក្នុងសង្កាត់និរោធ ខណ្ឌច្បារអំពៅ។

ប្រភព​ពត៌មាននៅក​ន្លែងកើតហេតុបានអោយដឹងថាមុនពេលកើតហេតុគេឃើញប្ដីប្រពន្ធពីរនាក់បើករថយន្តមួយគ្រឿងម៉ាក ISUZU MU-Xពណ័ទឹកប្រាក់ ស៊េរី២០១៨ពាក់ស្លាកលេខភ្នំពេញ 2AT-7116 ធ្វើដំណើរតាមបណ្ដោយផ្លូវជាតិលេខ១ ក្នុងទិសដៅពីលិចទៅកើតយ៉ាងលឿន ខណះមកដល់ចំណុចកើតហេតុបានរេចង្កូតជ្រុលទៅបុកបង្គោលភ្លើងបំភ្លឺផ្លូវមួយដើមបាក់រៀបដល់ដី ចំណែក​រថយន្តកល់ជាប់លើទ្រូវផ្លូវទៅមុខលែងរួច តែសំណាងល្អមិនមានអ្នករងរបួស គ្រាន់តែខូចខាតរថយន្តប៉ុណ្ណោះ។

បន្ទាប់ពីកើតហេតុសមត្ថកិច្ចជំនាញចរាចរចុះមកស្ទូចយករថយន្តបង្កទៅរក្សាទុកនៅអធិការដ្ឋាននគរបាលខណ្ឌច្បារអំពៅ រងចាំដោះស្រាយនៅពេលក្រោយ៕ជ្រោយពេជ្រ