ញាក់សាច់រថយន្តបុកម៉ូតូ ហើយជ្រុលបុកម៉ូតូកង់បី ស្លាប់ម្នាក់ របួសធ្ងន់ ស្រាល២នាក់

ខេត្តស្វាយរៀង៖ មានករណីគ្រោះថ្នាក់ចរាចរណ៍ គួរឲ្យរន្ធត់ និងតក់ស្លុតបំផុត បណ្ដាលឲ្យបុរសម្នាក់ស្លាប់ និងរបួសធ្ងន់ ស្រាល២នាក់ ដោយរថយន្ត បុកជាមួយម៉ូតូហើយ ជ្រុលចង្កូតទៅបុកម៉ូតូកង់៣ យ៉ាងពេញទំហឹងបង្កការភ្ញាក់ផ្អើល ដល់អ្នកភូមិទាំងយប់ ខណៈកំពុងដេកលង់លក់ស្កប់ស្កល់ ។

ហេតុការណ៍នេះ បានកើតឡើងកាលពីថ្ងៃទី២ ខែមករា ឆ្នាំ២០១៩ វេលាម៉ោង៣ និង៤០ នាទីទៀបភ្លឺ នៅលើផ្លូវជាតិលេខ០១ត្រង់ចំណុចគីឡូម៉ែត្រលេខ១៦៦-១៦៧ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ។

តាមសមត្ថកិច្ចនគរបាលក្រុងបាវិតបានឲ្យដឹងថាបុរសដែលស្លាប់ជាអ្នករត់ម៉ូតូកង់៣មានឈ្មោះរស់ ឆេន អាយុ ៤៨ ឆ្នាំជនជាតិខ្មែរ មុខរបររត់ម៉ូតូកង់៣ មានទីលំនៅ ភូមិចំបក់ពាម សង្កាត់សង្ឃ័រ ក្រុងស្វាយរៀង ខេត្តស្វាយរៀង ។

ចំណែកអ្នករងរបួសធ្ងន់ ស្រាល មាន ឈ្មោះដា នីនែល ភេទប្រុសអាយុ៣១ឆ្នាំ ជនជាតិឥណ្ឌូនីស៊ី មុខរបរ បុគ្គលិកកាស៊ីណូ ស្នាក់នៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង និងឈ្មោះរួ ឌី ភេទប្រុសអាយុ៣១ឆ្នាំជនជាតិឥណ្ឌូនីស៊ី មុខរបរបុគ្គលិកកាស៊ីណូ ។

ប្រភពបន្តថា ចំណែកអ្នកបើករថយន្តបង្កហេតុត្រូវបានសមត្ថកិច្ចឃាត់ខ្លួនមានឈ្មោះឆាយ បូរ៉ាភេទ ប្រុសអាយុ២៤ឆ្នាំជនជាតិខ្មែរមុខរបរបើកបររថយន្តតាក់ស៊ី រស់នៅភូមិ១១ សង្កាត់ជ័យជំនះ ខណ្ឌដូនពេញ រាជធានីភ្នំពេញ ។

តាមសាក្សីបានឲ្យដឹងថា មុនកើតហេតុ មានរថយន្ដ១គ្រឿង ម៉ាក HiGALALDER ពាក់ស្លាលលេខ ភ្នំពេញ 2AC-5785 ពណ៌ទឹកប្រាក់បើកបរដោយបុរសម្នាក់ដែលធ្វើដំណើរពីកើតទៅលិចលើកំណាត់ផ្លូវជាតិលេខ១លុះ បើកបរមកដល់ចំណុចកើតហេតុខាងលើ ក៏បានបុកប៉ះនឹងម៉ូតូ១គ្រឿងម៉ាកអេប៉េឡែត ពណ៌ខៀវ ពាក់ស្លាកលេខ70.E1-32897ជិះគ្នា២នាក់ក្នុងទិសដៅលិចទៅកើតបញ្រាស់គ្នារួចក៏បានជ្រុលចង្កូតទៅបុកប៉ៈ និងម៉ូតូកង់៣មួយគ្រឿងទៀតម៉ាកហុងដាឆ្លាមពណ៌ខ្មៅ ស្លាកលេខភ្នំភេញ1AG- 6712បណ្ដាលឲ្យបុរសខាងលើស្លាប់នៅកន្លែងកើតហេតុ ចំណែកអ្នកជិះម៉ូតូរបួសធ្ងន់ស្រាល ។

ចំពោះ សាកសពសមត្ថកិច្ចបានប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណីខ្មែរ ចំណែកជនរងគ្រោះបានបញ្ជូនទៅមន្ទីរពេទ្យបង្អែកខេត្តស្វាយរៀង ។

បច្ចុប្បន្នវត្ថុតាងទាំង៣គ្រឿង ត្រូវបានសមត្ថកិច្ចវាស់វែង និងរក្សាទុកនៅអធិការដ្ឋាននគរបាលក្រុងបាវិតដើម្បីបំពេញសំណុំរឿងចាត់ការតាមនីតិវិធីច្បាប់ ៕ យឹម សុថាន