បើកម៉ូតូមិនប្រយ័ត្នជ្រុលទៅបុករថយន្ដបើកស្របទិសគ្នាបណ្ដាលឲ្យបុរសម្នាក់ស្លាប់

ខេត្តកណ្ដាល៖ បុរសម្នាក់បើកបរម៉ូតូមិនប្រយ័ត្ន បានបុករថយន្ដមួយគ្រឿងបើកបរក្នុងទិសដៅស្របទិសគ្នា បណ្ដាលឲ្យបុរសជាអ្នកបើកបរម៉ូតូស្លាប់ភ្លាមៗនៅកន្លែងកើតហេតុ កាលពីវេលាម៉ោង១៨និង៤០នាទី ថ្ងៃទី៦ ខែមករា ឆ្នាំ២០១៩ ត្រង់ចន្លោះគីឡូម៉ែត្រលេខ៣៦-៣៧ លើកំណាត់ផ្លូវលេខ៨ ស្ថិតក្នុងភូមិព្រៃចាស់ ឃុំវិហ៊ារសួគ៌ ស្រុកខ្សាច់កណ្ដាល ខេត្តកណ្ដាល ។

មន្រ្ដីនគរបាលចរាចរណ៍ស្រុកខ្សាច់កណ្ដាលបានឲ្យដឹងថា ជនរងគ្រោះស្លាប់បាត់បង់ជីវិតពុំទាន់ស្គាល់អត្ដសញ្ញាណ ភេទប្រុស បើកបរម៉ូតូម៉ាកស៊ុយហ្ស៊ូគីនិច ធុនសេ១១០ ពណ៌សរលាយខ្មៅ ពាក់ស្លាកលេខភ្នំពេញ1HB-7055 ចំណែករថយន្ដម៉ាកHYUNDAI ពណ៌ស ប្រភេទដឹកទំនិញ ពាក់ស្លាកលេខកំពង់ចាម3A–2870 បើកបរដោយជនមិនស្គាល់អត្តសញ្ញាណ(រត់គេចខ្លួនបាត់) ។

ប្រភពដដែលបន្ដថា នៅមុនពេលកើតហេតុ សាក្សីបានឃើញជនរងគ្រោះបើកបរម៉ូតូម៉ាកស៊ុយហ្ស៊ូគីនិច ធ្វើដំណើរក្នុងទិសដៅកើតទៅលិច តាមបណ្ដោយផ្លូវលេខ៨ លុះបើកមកដល់ចំណុចកើតហេតុ ម៉ូតូខាងលើ បានបើកបុករថយន្ដ HYUNDAI ដែលធ្វើដំណើរក្នុងទិសដៅស្របគ្នាពេញមួយទំហឹង បណ្ដាលឲ្យជនរងគ្រោះជាអ្នកបើកបរម៉ូតូស្លាប់ភ្លាមៗនៅកន្លែងកើតហេតុ រីឯអ្នកបើកបររថយន្ដបានទុករថយន្ដរបស់ខ្លួនចោល រួចរត់គេចខ្លួនបាត់ស្រមោល ។

ក្រោយពីមានហេតុការណ៍កើតឡើង នគរបាលជំនាញចរាចរណ៍ស្រុកបានចុះមកធ្វើការវាស់វែង កន្លែងកើតហេតុ រួចកសាងឯកសារដកហូតយកមធ្យោយបាយពាក់ព័ន្ធទាំង២គ្រឿងយកមករក្សាទុកនៅអធិការដ្ឋាននគរបាលស្រុក ដើម្បីចាត់ការតាមនីតិវិធីច្បាប់ ។ ចំណែកសាកសពជនរងគ្រោះត្រូវបានសមត្ថកិច្ចនគរបាលយកទៅរក្សាទុកនៅវត្តស្វាយរមៀត ស្រុកខ្សាច់កណ្ដាល រងចាំសាច់ញាតិមកទទួលយកទៅធ្វើបុណ្យតាមប្រពៃណី ៕ ស្អាងជ័យ