សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: បុរសម្នាក់បានបើករថយន្តដឹកទំនិញមួយគ្រឿង ជ្រុលទៅបុករថយន្ត២គ្រឿង នៅផ្លូវបែកជាបួន ហើយព្យាយាមបើករថយន្តទៅឈប់ នៅខាងមុខផ្សារទំនើបអ៊ីអន២ ។ ហេតុការណ៍នេះ បានកើតឡើងកាលពីម៉ោង៨យប់ ថ្ងៃទី១៦ ខែមករា ឆ្នាំ២០១៩ នៅតាមបណ្ដោយឧកញ៉ា ម៉ុងរិទ្ធី កែងនឹងផ្លូវ ១០១៥ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើត គេឃើញបុរសម្នាក់ បានបើកបររថយន្តកូរ៉េមួយគ្រឿង ម៉ាកហ៊ីយ៉ាន់ដាយ ប្រភេទប្រាំតោន ពណ៌ស ពាក់ស្លាកលេខ ភ្នំពេញ 3D-0214 ធ្វើដំណើរតាមបណ្តោយផ្លូវឧកញ៉ា ម៉ុងរិទ្ធី ក្នុងទិសដៅ ពីលិចទៅកើត យ៉ាងលឿន ខណៈមកដល់ចំណុចកើតហេតុ បានជ្រុលទៅបុកពីក្រោយរថយន្តមួយគ្រឿងម៉ាក ឡិចស៊ីស LX470 ពណ៌ស្ករ ពាក់ស្លាកលេខ ភ្នំពេញ2L-9192 ដែលបើកបរដោយបុរសម្នាក់ កំពុងឈប់ឲ្យរថយន្តមួយគ្រឿងទៀតម៉ាក តូយូតាព្រូស ពណ៌ក្រហម ពាក់ស្លាកលេខ ភ្នំពេញ2AR-3019 បើកបរដោយបុរសម្នាក់ ក្នុងទិសដៅបញ្រ្ចាសទិសគ្នា បត់ឆ្វេងឆ្លងផ្លូវ បណ្ដាលឲ្យរថយន្តលុចស៊ីសខ្ទាតទៅបុកនិងរថយន្តព្រូស ដែលបើកឆ្លងផ្លូវនៅខាងមុនពេញទំហឹង បណ្តាលឲ្យរថយន្តទាំង២គ្រឿងរងការខូចខាត។
ភ្លាមៗនោះរថយន្តបង្ក បានព្យាយាមបើករត់គេចខ្លួនចេញពីកន្លែងកើតហេតុ មកឈប់នៅខាងមុខផ្សារទំនើបអ៊ីអន២ រួចអ្នកបើកបរ បានទុកតែរថយន្តរត់គេចខ្លួនបាត់ ។
បន្ទាប់ពីកើតហេតុសមត្ថកិច្ចមូលដ្ឋាន និងសមត្ថកិច្ចជំនាញចរាចរ បានចុះទៅដល់កន្លែងកើតហេតុ វាស់វែង យករថយន្តទាំងបីគ្រឿងទៅរក្សាទុកនៅអធិការដ្ឋាននគរបាលខណ្ឌសែនសុខ រង់ចាំដោះស្រាយគ្នានៅពេលក្រោយ ៕ ជ្រោយពេជ្រ
