សារព័ត៌មាន នគរវត្ត តែងតែនាំមុខគេជានិច្ច
កីឡាករអាមេរិក Adrien Broner បានទទួលបរាជ័យយ៉ាងជូរចត់ ក្រោយសង្វៀន១២ទឹក ជាមួយ កីឡាករប្រដាល់ហ្វីលីពីន Manny Pacquiao នៅសង្វៀន MGM Grand Garden សហរដ្ឋអាមេរិក កាលថ្ងៃអាទិត្យ ទី២០ ខែមករា ឆ្នាំ២០១៩ ។
ប៉ុន្តែ Pacquiao អាយុ៤០ឆ្នាំ ធ្វើមិនបានសម្រេច ផ្តួលគូប្រកួតឲ្យសន្លប់ ឬបោះបង់ចោលការប្រកួតនោះទេ គឺប្រកួតរហូតដល់ចប់១២ទឹក ឈ្នះដោយពិន្ទុប៉ុណ្ណោះ ។
ទោះបីយ៉ាងណា នេះក៏ជាការស្តារមុខមាត់របស់ស្តេចប្រដាល់ហ្វីលីពីន Pacquiaoផងដែរ បន្ទាប់ពីវាយចាញ់ អ្នកប្រដាល់អូស្ត្រាលី Jeff Horn នៅទីក្រុង Brisbane កាលពីខែកក្កដា ឆ្នាំ២០១៧ និងបានបាត់បង់ខ្សែក្រវាត់ WBO មួយខ្សែ ។
Manny Pacquiao បន្តគ្រប់គ្រងខ្សែក្រវាត់ទម្ងន់មធ្យមពិភពលោក WBA ដដែល និងទទួលបានទឹកប្រាក់២០លានដុល្លារ ។
សូមបញ្ជាក់ថា កីឡាករ Manny Pacquiao មានកម្ពស់ ១.៦៦ម៉ែត្រ ប្រវត្តិប្រកួតលើសង្វៀន៧០ប្រកួត ឈ្នះ៦១ដង ចាញ់៧ដង និងស្មើ២ដង ក្នុងនោះផ្តួលដៃគូសន្លប់បាន៣៩ដង ៕
