សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ គ្រោះថ្នាក់ចរាចរណ៍រវាងរថយន្តបុក នឹងរថយន្ត កាលពីវេលាម៉ោង២៣ និង២៣នាទីថ្ងៃទី២១ ខែមករា ឆ្នាំ២០១៩ ស្ថិតនៅលើកំណាត់ផ្លូវជាតិលេខ០៦ ចន្លោះគីឡូម៉ែត្រលេខ១៣៦-១៣៧ ស្ថិតនៅភូមិត្រើយម្យាប ឃុំប្រាសាទ ស្រុកសន្ទុក ខេត្តកំពង់ធំ ជាប់ និងជញ្ជីងថ្លឹងរថយន្តចំណុចផ្លូវកោង ។
សមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះក្នុងទិសដៅ ពីជើងទៅត្បូង បណ្តាលឲ្យបុរសម្នាក់ស្លាប់នៅកន្លែងកើតហេតុ អ្នកបើកបរ រថយន្តម៉ាកហ៊ីយ៉ាន់ដាយ ក្បាលពណ៌ស ទ្រុងពណ៌បៃតង ស្លាកលេខ កំពង់ធំ 3A.2301(ដឹកស្រូវ) បើកបរដោយឈ្មោះ ស្នា ភេទប្រុស អាយុ២៩ឆ្នាំរស់ នៅភូមិថ្នល់បែក ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ (គេចខ្លួន) ។ អ្នករួមដំណើរឈ្មោះ ប៊ិនវុទ្ធី ភេទប្រុស អាយុ៣០ឆ្នាំ នៅភូមិរលួស សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ជាម្ចាស់រថយន្ត ស្លាប់នៅកន្លែងកើតហេតុ ។
ចំណែករថយន្តម៉ាកហ៊ីយ៉ាន់ដាយ ក្បាលពណ៌ទឹកប្រាក់ ទ្រុងពណ៌ខ្មៅ ស្លាកលេខគ្មាន (ដឹកមើមដំឡូងមី) អ្នកបើកបរមិនស្គាល់អត្តសញ្ញាណ (គេចខ្លួន)។
មូលហេតុបង្កឡើងដោយអ្នកបើកបររថយន្តដឹកស្រូវស្លាកលេខកំពង់ធំ3A.230 ឈ្មោះ ស្នា បើកបរមានល្បឿនលឿនខ្ជីខ្ជារខ្វះការប្រុងប្រយ័ត្ននៅចំណុចផ្លូវកោង ។
តាមប្រភពព័ត៌មានបានឲ្យដឹងថា រថយន្តដែលបង្កឲ្យគ្រោះចរាចរណ៍នេះ ឈប់បង់លុយឲ្យជញ្ជីងខណៈរថយន្តមួយទៀត គេបានតេតាមទូរស័ពរួចហើយ ក៏មកបុករថយន្តឈប់បង់លុយតែម្ដង។
ក្រោយកើតហេតុសមត្ថកិច្ចចុះវាស់វែងធ្វើកំណត់ហេតុ និងប្រមូល វត្ថុតាងរក្សាទុកយកទៅរក្សាទុកនៅអធិការដ្ឋាននគរបាលស្រុកសន្ទុក ចំណែកសាកសពប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕ ប៊ុនរិទ្ធី
