សារព័ត៌មាន នគរវត្ត តែងតែនាំមុខគេជានិច្ច
ប៉ោយប៉ែត៖ សមត្ថកិច្ចជំនាញប្រឆាំងបទល្មើសសេដ្ឋកិច្ចខេត្ត រកឃើញទីតាំងផលិតស្ករត្នោត ក្លែងក្លាយយូអង្វែងមួយកន្លែង កាលពីព្រឹកថ្ងៃទី២៣ ខែមករា ឆ្នាំ២០១៩ នៅខាងកើតផ្សារសមាគមចម្ងាយប្រហែល២០០ម៉ែត្រ តាមបណ្ដោយផ្លូវបេតុង ឋិតក្នុងភូមិចាន់គិរី សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
សមត្ថកិច្ចប្រាប់ថា ម្ចាស់ទីតាំងឈ្មោះផៃ សំណាង ភេទប្រុស អាយុ២៦ឆ្នាំ និងប្រពន្ធឈ្មោះ សុខ ម៉ី អាយុ២៥ឆ្នាំ រស់នៅភូមិកើតហេតុ ។
លោកវរសេនីយ៍ទោ រស់ អៀម នាយរងប្រឆាំងបទល្មើសស្នងការដ្ឋាននគរបាលខេត្តបន្ទាយមានជ័យប្រាប់ថា កម្លាំងបានសហការជាមួយសមត្ថកិច្ចជំនាញពាក់ព័ន្ធនៅក្រុងប៉ោយប៉ែត ដឹកនាំដោយលោកតេង សាម៉ៃ ព្រះរាជអាជ្ញារងនៃសាលាដំបូងខេត្ត និងលោកឧត្តមសេនីយ៍ត្រី ចាប សុផារឹទ្ធ ស្នងការរងទទួលផែនប្រឆាំងបទល្មើសនៃស្នងការដ្ឋាននគរបាលខេត្ត បានឃ្លាំមើលទីតាំងមួយនេះអស់រយៈពេលមួយយប់មកហើយ លុះព្រឹកឡើងថ្ងៃទី២៣ មករា ២០១៩ ក៏ឆ្មក់ចូលបង្ក្រាបតែម្តង ។
នៅក្នុងប្រតិបត្តិការនោះ សមត្ថកិច្ចដកហូតវត្ថុតាង ស្ករស៩០០គីឡូក្រាម ស្ករត្នោតមិនទាន់កែច្នៃ៣០ការ៉ុង ឆ្នាំងខ្ទះបំពាក់ម៉ូទ័រវាយស្ករចំនួន១ សាច់ជូចំនួន៦០០ក្រាម និងស្ករត្នោតកែច្នៃរួចចំនួន៥០គីឡូក្រាម ។
សមត្ថកិច្ចបន្ថែមថា យោងតាមការសាកសួរម្ចាស់ទីតាំងបញ្ជាក់ថា សារធាតុផ្សំមានចំនួន៤មុខ សាច់ជូ ស្ករស ទឹកសុទ្ធ ក្នុងនោះស្ករត្នោត១០គីឡូក្រាម ស្មើស្ករស១ការ៉ុង បូកនឹងសាច់ជូ និងទឹក ហើយទីតាំងខាងលើផលិតស្ករត្នោតក្លែងក្លាយរយ:ពេល៧ឆ្នាំមកហើយ ។
សមត្ថកិច្ចបញ្ជាក់ថា ការផលិតស្ករត្នោតខាងលើ ពេលយើងយកទៅបរិភោគ វានឹងធ្វើឲ្យប៉ះពាល់ដល់សុខភាព ព្រោះថាការផលិតស្ករត្នោតក្លែងក្លាយនេះ មិនមានការត្រួតពិនិត្យពីមន្ត្រីជំនាញ និងទៅតាមស្តងដារ ពុំមានបច្ចេកទេសគ្រប់គ្រាន់ កាលណាយកទៅបរិភោគ ធ្វើឲ្យប៉ះពាលសុខភាព មានអការក្អួតចង្អោរ ឈឺក្រពះ ពោះវៀន ទឹកនោមផ្អែម ឡើជាតិអាស៊ិត រលាកពោះវៀន ។ ល ។ ជាពិសេសក្មេងៗតែម្តងងាយនឹងរងគ្រោះណាស់ ។
លោកឧត្តមសេនីយ៍ត្រី ចាប សុផារឹទ្ធ ស្នងការរងទទួលផែនប្រឆាំងបទល្មើស នៃស្នងការដ្ឋាននគរបាលខេត្ត បញ្ជាក់ថា ទីតាំងខាងលើគីជាទីតាំងផលិតស្ករត្នោតក្លែងក្លាយ ដោយយកស្ករត្នោតជាសារធាតុដើមដាក់ជាមួយ ស្ករស បួកជាមួយសាច់ជូ និងទឹករួចដាក់រម្ងាស់ ហើយទីតាំងនេះ គីជាទីតាំងផលិតស្ករត្នោតខុសច្បាប់ ធ្វើឲ្យមានការប៉ះពាល់យ៉ាងណានោះ គឺមន្ត្រីកាំកុងត្រូលយកស្ករដែលបំឡែងរួចចូលបទពិសោធន៍សិន ។
អ្នកស្រុកបង្ហើបថា ទីតាំងលួចផលិតស្ករត្នោតក្លែងក្លាយនេះ កើតមានជិត១០ឆ្នាំមកហើយ ទើបបែកធ្លាយនាពេលនេះ ។ ទោះយ៉ាងណា ក្រោយពីមានការឆែកឆេររបស់មន្ត្រីជំនាញ ម្ចាស់ផ្ទះត្រូវកម្លាំងសមត្ថកិច្ចជំនាញហៅទៅស្នងការនគរបាលខេត្តបន្ទាយមានជ័យ ដើម្បីសួរនាំ និងធ្វើកំណត់ហេតុ កសាងសំណុំរឿងបញ្ជូនបន្ត ។ ចំណែកផ្ទះដែលជាទីតាំងផលិតស្ករត្នោតត្រូវបានសមត្ថកិច្ចចាក់សោបិទបណ្ដោះអាសន្ន ក្រោមការបញ្ជារបស់ព្រះរាជអាជ្ញាខេត្ត ៕ វណ្ណា
