សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ បុរសម្នាក់បានស្លាប់ ក្នុងហេតុការណ៍គ្រោះថ្នាក់ចរាចរណ៍ រវាងរថយន្ត បុកនឹងម៉ូតូ ក្នុងទិសដៅស្របគ្នា (ពីកើតទៅលិច) ។
ហេតុការណ៍នេះ បានកើតឡើងកាលពីវេលាម៉ោង២៣និង៤៧នាទី ថ្ងៃចន្ទ ១៥រោច ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៤ ខែកុម្ភៈ ឆ្នាំ២០១៩ លើកំណាត់ផ្លូវជាតិលេខ០៦ ចន្លោះគីឡូម៉ែត្រលេខ១៨២-១៨៣ ភូមិព្រៃព្រាល(ក) ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ។
សមត្ថកិច្ចបានឲ្យដឹងថា អ្នកបើកបរម៉ូតូដោយឈ្មោះ ឈិត ផន ភេទប្រុស អាយុ៧២ឆ្នាំ បានបើកបរម៉ូតូហុងដាព្រីម C125 ពណ៌ខ្មៅ ស្លាកលេខកំពង់ធំ 1J F.6724 នៅភូមិ ឃុំកើតហេតុខាងលើ ស្លាប់នៅកន្លែងកើតហេតុ (មិនពាក់មួកសុវត្ថិភាព)។
ចំណែកអ្នកបើករថយន្តម៉ាកFUSO ពណ៌ស ស្លាកលេខកំពង់ចាម 3A.7338 អ្នកបើកបរឈ្មោះ នៅ វាសនា ភេទប្រុស អាយុ២៧ឆ្នាំ នៅភូមិអណ្តូងសំរឹទ្ធ ឃុំធ្លាប្រជុំ ស្រុកកោះអណ្តែត ខេត្តតាកែវ នាំខ្លួនទៅអធិការដ្ឋាននគរបាលស្រុកកំពង់ស្វាយ ។
សមត្ថកិច្ចបានបញ្ជាក់ថា មូលហេតុបឋមបង្កឡើងដោយអ្នកបើកបររថយន្ត បើកបរក្នុងស្ថានភាពស្រវឹង ដែលមានជាតិអាល់កុល ០,៥៧មីលី្លក្រាម ក្នុងមួយលីត្រខ្យល់ បានរេចង្កូតទៅបុកម៉ូតូដែលកំពុងចរាចរក្នុងគន្លងផ្លូវរបស់ម៉ូតូពីក្រោយ។
ក្រោយកើតហេតុ សមត្ថកិច្ចចុះវាស់វែងធ្វើកំណត់ហេតុប្រមូល វត្ថុតាងយករក្សាទុកនៅអធិការដ្ឋាននគរបាលកំពង់ស្វាយ ចំណែកសាកសពប្រគល់ឲ្យសាច់ញាតិក្រុមគ្រួសារចាត់ចែងធ្វើបុណ្យតាមប្រពៃណី ៕ ប៊ុនរិទ្ធី
