សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ម៉ូតូធុនធំមួយគ្រឿងបើកបរក្នុងល្បឿនលឿន មិនប្រយ័ត្នជ្រុលបុកលោកតាវ័យ៨១ឆ្នាំ ម្នាក់បណ្តាលឲ្យស្លាប់យ៉ាងអាណោចអាធម័ ខណៈកំពុង បណ្តើរកងឆ្លងផ្លូវ កាលពីវេលាម៉ោង១២និង៥០នាទី ថ្ងៃទី០៧ ខែកុម្ភៈ ឆ្នាំ២០១៩ នៅផ្លូវជាតិលេខ៤ ត្រង់ចំណុចភូមិអង្គ សង្កាត់ចោមចៅ៣ ខណ្ឌពោធិសែនជ័យ ។
លោកតារងគ្រោះមានឈ្មោះ សះ សែម អាយុ៨១ឆ្នាំ មានទីលំនៅ ភូមិកំរៀង សង្កាត់កន្ទោក ខណ្ឌពោធិសែនជ័យ ។
តាមប្រភពនៅកន្លែងកើតហេតុ ពលរដ្ឋឃើញហេតុការណ៍ បានឲ្យដឹងថា មុនកើតហេតុ ជនរងគ្រោះ បានបណ្តើរកង់ ឆ្លងផ្លូវជាតិលេខ៤ ពីជើងទៅត្បូង លោកតាលើកទាំងដៃ ជាសញ្ញាផង ស្របពេលនោះ ស្រាប់តែមានម៉ូតូធុនធំមួយគ្រឿង ពណ៌លឿង មិនចាំម៉ាក ស្លាកលេខ បើកបរក្នុងល្បឿនលឿនពីលិចទៅកើត ជ្រុលមកបុកលោកតា ដែកំពុងបណ្តើរកង់ពេញទំហឹង ផ្លោងខ្ទាតជាច្រើនម៉ែត្រ បណ្តាលឲ្យបោកក្បាលស្លាប់ភ្លាមៗនៅកណ្តាលផ្លូវជាតិយ៉ាងអាណោចអាធ័ម ម៉ូតូបង្ក មិនដួល បានបន្ថែមល្បឿនបើករត់គេចតាមបណ្តោយផ្លូវជាតិលេខ៤ទៅខាងកើតបាត់ស្រមោល បន្សល់ទុកតែសាកសព និងកង់ រួមជាមួយកាងម៉ូតូខាងក្រោយធ្លាក់លើផ្លូវ នៅកន្លែងកើតហេតុ ។
ក្រោយកើតហេតុ សមត្ថកិច្ចចុះទៅពិនិត្យដល់កន្លែងកើតហេតុ ប្រគល់សពជូនក្រុមគ្រួសារ ចាត់ចែងដឹកយកទៅធ្វើបុណ្យតាមប្រពៃណី នៅឯផ្ទះក្បែរនោះ រីឯសមត្ថកិច្ច និងបន្តស្រាវជ្រាវ ស្វែងរកម៉ូតូបង្ក ដើម្បីដោះស្រាយតាមច្បាប់ ៕ សុខាសែនជ័យ
