សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ លោកតាអាចារ្យអាយុ៨១ឆ្នាំ ម្នាក់បានស្លាប់ភ្លាមៗ ខណៈជួបករណីគ្រោះថ្នាក់ចរាចរណ៍គួរឲ្យរន្ធត់ ជិះម៉ូតូបត់ឆ្វេង ខ្វះប្រុងប្រយត្ន័ ត្រូវរថយន្តមកពីក្រោយ ចាប់ហ្វ្រាំងមិនទាន់បុកពេញទំហឹង កាលពីថ្ងៃ ពុធ២ កើត ខែ មាឃ ឆ្នាំ ច សំរឹទ្ធិស័ក ព.ស ២៥៦២ ត្រូវ នឹងថ្ងៃទី៦ ខែកុម្ភៈ ឆ្នាំ២០១៩ វេលាម៉ោង១០ និង៣០នាទីព្រឹក លើផ្លូវជាតិលេខ ០១ ស្ថិតក្នុងភូមិសាមគ្គី សង្កាត់ស្វាយតឿ ក្រុងស្វាយរៀង ។
បើតាមសមត្ថកិច្ចនគរបាលក្រុងស្វាយរៀងបានឲ្យដឹងថា លោកតា ដែលស្លាប់មានឈ្មោះ ពេជ្រ ម៉ន អាយុ ៨១ឆ្នាំ មុខរបរ អាចារ្យវត្តសំបួរ រស់នៅភូមិ ព្រៃសម្ព័រ ឃុំ សំបួរ ស្រុក ស្វាយទាប ខេត្ត ស្វាយរៀង ជិះម៉ូតូម៉ាក្ ហុងដាសេ ១២៥ ពណ៌ខ្មៅ ពាក់ផ្លាកលេខ ស្វាយរៀង ១A ៨១៩៥ ខូចខាតទាំងស្រុង ។
ចំណែកអ្នកបើករថយន្តមិនត្រូវបានស្គាល់ឈ្មោះនោះទេ ក្រោយបង្កហេតុ បានជិះរថយន្តគេចពីលិចទៅកើតភ្លាមៗ ។
តាមសាក្សីបានឲ្យដឹងថា មុនកើតហេតុមានលោកតាអាចារ្យម្នាក់បានជិះម៉ូតូមួយគ្រឿងម៉ាក ហុងដាសេ ១២៥ ពណ៌ ខ្មៅ ពាក់ផ្លាកលេខ ស្វាយរៀង ១A ៨១៩៥ ធ្វើដំណើរពីលិចទៅកើត លើកំណាត់ផ្លូវជាតិលេខ១ហើយ ក៏បានបត់ឆ្វេងខ្វះប្រុងប្រយត្ន័ ស្រាប់តែមានរថយន្តម៉ាកហាយឡេនឌ័មិនចាំស្លាកលេខ បើកមកពីក្រោយចាប់ហ្វ្រាំងមិនទាន់ ក៏បុកពេញទំហឹងលាន់សូរដូចរន្ទះបង្កការភ្ញាក់ផ្អើលតែម្ដង។
ក្រោយកើតហេតុអ្នកបើករថយន្តឃើញ សភាពការណ៍មិនស្រួល ក៏បានបើកគេចចេញភ្លាមៗបន្សល់តែលោកតា និងម៉ូតូកណ្ដាលផ្លូវ។
សពលោកតាត្រូវបានសមត្ថកិច្ចមូលដ្ឋានប្រគល់ឲ្យ ក្រុមគ្រួសារយកទៅធ្វើបុណ្យតាមប្រពៃណីទាំងក្ដុកក្ដួលបំផុត ៕ យឹម សុថាន
