សារព័ត៌មាន នគរវត្ត តែងតែនាំមុខគេជានិច្ច
ទំនាក់ទំនងរវាងរុស្ស៊ី នឹងអ៊ុយក្រែន កំពុងប្រឈមមុខតានតឹងដាក់គ្នា ហើយពេលនេះ កំពុងតែតានតឹងទៀត ខណៈប្រទេសអ៊ុយក្រេនបានត្រៀមល្ខណៈបោះឆ្នោត ដោយមានបេក្ខភាពច្រើនរូប ប្រកាសថា នឹងដណ្តើមយកតំបន់គ្រីមៀពីរុស្ស៊ីមកវិញ ។
នៅថ្ងៃទី១២ ខែកុម្ភៈ កម្លាំងទាហានជើងទឹក អ៊ុយក្រែន និង១០ប្រទេសផ្សេងទៀត បានចូលរួមធ្វើសមយុទ្ធនៅសមុទ្រខ្មៅ រុស្ស៊ីព្រមានពីគ្រោះថ្នាក់ ។ សមយុទ្ធជាប្រចាំដែលមានឈ្មោះថា Sea Breeze 2019 នឹងធ្វើឡើងនៅតំបន់ ភាគពាយព្យនៃសមុទ្រខ្មៅ ជាប់ដែនសមុទ្រ ខេត្ត Odessa , Mykolaiv និង Kherson ក្នុងប្រទេសអ៊ុយក្រែន ដោយមានការចូលរួមពី១១ប្រទេស។
តាមគម្រោងដែលបានប្រកាសដោយក្រសួងការពារជាតិអ៊ុយក្រែន សមយុទ្ធ កម្លាំងទាហានជើងទឹកអន្តរជាតិ មានឈ្មោះថា Sea Breeze 2019 ដោយមានយុទ្ធសាស្ត្រថ្មីៗជាច្រើន រួមទាំង ការដាក់ពង្រាយកម្លាំងទាហានជើងគោកនិងអាកាសរបស់ប្រទេសសមាជិកណាតូ ព្រមទាំងនាវាចម្បាំង ។
ក្រសួងការពារជាតិអ៊ុយក្រែនបានបញ្ជាក់ថា គោលដៅខាងលើគឺដើម្បីរក្សាសន្តិសុខស្ថេរភាព នៅតំបន់សមុទ្រខ្មៅ។ ចំណែករដ្ឋលេខាធិការក្រសួងការបរទេសរុស្ស៊ីលោក Grigory Karasin បានបញ្ជាក់ថា សកម្មភាពធ្វើសមយុទ្ធខាងលើ ពិតជាមានគ្រោះថ្នាក់ បង្កឲ្យមានភាពតានតឹងកាន់តែខ្លាំង។
សមយុទ្ធ Sea Breeze បានធ្វើឡើងជារៀងរាល់ឆ្នាំចាប់តាំងពីឆ្នាំ១៩៩៧ តាមកិច្ចព្រមព្រៀង សហប្រតិបត្តិការសន្តិសុខ រវាង អាមេរិកនឹងអ៊ុយក្រែន។ សមយុទ្ធកាលពីឆ្នាំ២០១៨ មានការចូលរួម ពី១៩ប្រទេសក្នុងតំបន់ ដោយមានទាហានជាង២ពាន់នាក់ នាវាចម្បាំង ៣០គ្រឿង។
ប៉ុន្តែសមយុទ្ធនៅក្នុងឆ្នាំនេះកើតឡើង ក្នុងពេលដែលរុស្ស៊ីនិងអ៊ុយក្រែន កំពុងតែ ប្រឈមមុខតានតឹងដាក់គ្នា មិនធ្លាប់មានចាប់តាំងពីឆ្នាំ២០១៤មកទល់ពេលនេះ ។ ការប្រឈមមុខតានតឹងដោយសារតែរុស្ស៊ីបានចាប់នាវាអ៊ុយក្រេន៣គ្រឿង រួមទាំងនាវឹក២៤នាក់ នៅតំបន់សមុទ្រ Kerch កាលពីខែវិច្ឆិកាឆ្នាំ២០១៨ ៕
