សារព័ត៌មាន នគរវត្ត តែងតែនាំមុខគេជានិច្ច
កម្លាំងទាហាន អ៊ីរ៉ាក់បានបំផ្លាញរូងក្រោមដី នៅព្រំដែនជាផ្លូវចេញចូលដ៏សំខាន់ របស់ក្រុមភេរវកម្ម ។ កន្លងមក ការឆ្លងកាត់ព្រំដែន ដែលមានការយាមល្បាតយ៉ាងតឹងតែងបំផុត រវាងអ៊ីរ៉ាក់ នឹងស៊ីរី ពីសំណាក់ក្រុមភេរវកម្ម IS ដោយសារតែមានរូងក្រោមដីជាច្រើនឆ្លងកាត់ព្រំដែន ។
នៅពេលនេះ កម្លាំងការពារព្រំដែនអ៊ីរ៉ាក់ បានរកឃើញ និងបំផ្លាញ រូងក្រោមដី១១កន្លែង ដែលក្រុមភេរវកម្ម IS បានប្រើប្រាស់ជាផ្លូវចូលក្នុងទឹកដីស៊ីរី ពីតំបន់វាលខ្យាច់ នៅក្នុងខេត្ត Anbar ប្រទេសអ៊ីរ៉ាក់ ចូលទៅកាន់ខេត្ត Dayr Al Zawr ប្រទេសស៊ីរី ។
ប្រព័ន្ធផ្សព្វផ្សាយ ក្នុងតំបន់បានផ្សាយថា កាលពីថ្ងៃទី១៣ ខែកុម្ភៈ កម្លាំងការពារព្រំដែនអ៊ីរ៉ាក់បានរកឃើញ ផ្លូវក្រោមដីខាងលើ ។ ចំណុចដែលគួរឲ្យចាប់អារម្មណ៍ជាងគេនោះ គឺផ្លូវក្រោមដី មានប្រវែងរហូតដល់ទៅ៣គីឡូម៉ែត្រ ជាការងាយស្រួលឆ្លងកាត់របស់ខ្មាន់កាំភ្លើងក្រុម IS ។
តាមប្រភពព័ត៌មានបានឲ្យដឹងថា កម្លាំងទាហានអ៊ីរ៉ាក់បានប៉ះទង្គិចគ្នាយ៉ាងខ្លាំង ក្រោយពេលក្រុមភេរវកម្មបានព្យាយាម ចូលទៅទឹកដីអ៊ីរ៉ាក់វិញ។ ខ្មាន់កាំភ្លើង IS រាប់សិបនាក់ត្រូវបានសម្លាប់ និងរងរបួសនៅក្នុងការបាញ់ប្រហារគ្នា ។
នៅក្នុងព្រឹត្តិការណ៍មួយផ្សេងទៀត ដែលពាក់ព័ន្ធនោះដែរ ក្រសួងមហាផ្ទៃអ៊ីរ៉ាក់ ប្រកាសថា បានចាប់ខ្លួនខ្មាន់កាំភ្លើងក្រុម IS ១៨៦នាក់ បានឡើងគម្រោង វាយប្រហារទៅលើទីតាំងនានាក្នុងទឹកដីអ៊ីរ៉ាក់ ៕
