សារព័ត៌មាន នគរវត្ត តែងតែនាំមុខគេជានិច្ច
ក្នុងពេលដែលកំពុងតែមានភាពតានតឹង ជុំវិញ កាណាដា នាំខ្លួនអគ្គនាយកហិរញ្ញវត្ថុ Huawei ទៅកាន់អាមេរិក ហើយក្រុមហ៊ុន Huawei បានសម្រេចប្តឹងរដ្ឋាភិបាល ប៉ូលិស ពីការបំពាន់ច្បាប់ ពេលនេះចិនក៏បានចោទប្រកាន់ពលរដ្ឋកាណាដាពីរនាក់ថា ជាចារកិច្ច ។
ការប្រឈមមុខតានតឹងរវាងជុំវិញ បញ្ហាខាងលើ បានធ្វើឲ្យទំនាក់ទំនងរវាងចិន នឹងកាណាដាកាន់តែឃ្លាតឆ្ងាយ ដោយប្រទេសទាំងពីរមានសកម្មភាពសងសឹកគ្នាទៅវិញទៅមក។
នាយករដ្ឋមន្ត្រីកាណាដា លោក Justin Trudeau បានសម្តែងការព្រួយចិត្តខ្លាំងណាស់ កាលពីថ្ងៃទី៤ មីនា ចំពោះពលរដ្ឋកាណាដា ដែលត្រូវចិនឃុំខ្លួន ដោយចោទពីបទចារកម្ម និងលួចព័ត៌មានសម្ងាត់ជាតិ ។
ការចោទប្រកាន់ទៅលើ Michael Kovring អតីតមន្ត្រីទូតកាណាដា បាននាំឲ្យមានការប្រឈមមុខតានតឹងដាក់គ្នាថែមទៀត រវាងទីក្រុងប៉េកាំង នឹងទីក្រុង អូតាវ៉ា ហើយក៏ជាមូលហេតុ បណ្តាលមកពីការចាប់ខ្លួនរបស់កាណាដាទៅលើប្រធានហិរញ្ញវត្ថុក្រុមហ៊ុន Huawei អ្នកស្រី Meng Wanzhou នោះផងដែរ ។
ថ្លែងប្រាប់ក្រុមអ្នកកាសែត លោកនាយករដ្ឋមន្ត្រីកាណាដា Trudeau បញ្ជាក់ថា «យើងពិតជាមានការភ័យបារម្ភខ្លាំងណាស់ គោលជំហរដែលចិនកំពុងប្រកាន់យកនេះ» ។
ថ្មីៗកន្លងទៅនេះ សារព័ត៌មានចិន ស៊ីនហួបានផ្សាយអំពីការចោទប្រកាន់ទៅលើលោក Kovrig និងថា អ្នកជំនាញ Michael Spavor នោះ ព្រមទាំងជនជាតិកាណាដាដទៃផ្សេងទៀត ដែលឃុំខ្លួននៅក្នុងប្រទេសចិន គឺជាប្រភពចារកម្មដ៏សំខាន់របស់ លោក Kovrig ។
ទាំងពីរនាក់ ត្រូវបានឃុំខ្លួននៅក្នុងខែធ្នូ ឆ្នាំ២០១៨ ដោយអាជ្ញាធរចិន តែប៉ុន្មានថ្ងៃប៉ុណ្ណោះ ក្រោយកាណាដា ចាប់ខ្លួនអ្នកស្រី Meng តាមសំណើរបស់សហរដ្ឋអាមេរិក ។អាជ្ញាធរចិន បានថ្លែងថា ជនជាតិកាណាដាទាំង២នាក់ ស្ថិតក្រោមការស៊ើបអង្កេត សង្ស័យធ្វើឲ្យគ្រោះថ្នាក់ដល់សន្តិសុខជាតិ និងធ្វើចារកម្មផងដែរ ដែលអាចផ្តន្ទាទោសយ៉ាងធ្ងន់ធ្ងរ ។
កាណាដាមានគម្រោងធ្វើបត្យាប័នអ្នកស្រី Meng ទៅកាន់ទឹកដីអាមេរិក ដែលធ្វើឲ្យទីក្រុងប៉េកាំងខឹងសម្បារយ៉ាងខ្លាំង និងបានព្រមានថា កាណាដា នឹងជួបនូវបញ្ហានយោបាយធ្ងន់ធ្ងរ ប្រសិនជាបញ្ជូនពលរដ្ឋចិនទៅកាន់អាមេរិកនោះ ។
អ្នកស្រី Meng នៅថ្ងៃពុធនេះ ត្រូវបញ្ជុនឡើងសវនាការទីក្រុង Vancouver ដើម្បីស្តាប់អំពីគម្រោងធ្វើបត្យាប័ន របស់គាត់ ។អាមេរិកចង់បាន អ្នកស្រី Meng ទៅទទួលទោសពីបទបន្លំ រំលោភបំពានច្បាប់ទណ្ឌកម្មអាមេរិកប្រឆាំងទៅលើអ៊ីរ៉ង់ និងការភូតកុហក់ធនាគារអាមេរិក។
នៅក្នុងករណីប្តឹងផ្តល់របស់ក្រុមហ៊ុនហួវាយ សារព័ត៌មាន Ney York Times កាលពីថ្ងៃទី៤ ខែមីនា បានដកស្រង់ សម្តីមន្ត្រីជាន់ខ្ពស់របស់ក្រុមហុន Huawei បញ្ជាក់ថា ក្រុមហ៊ុនទូរគមនាគមន៍ ធំបំផុតរបស់ចិន Huawei កំពុងតែ រៀបចំឯកសារប្តឹងអាមេរិក នៅតុលាការរដ្ឋតិចសាស់ ដែលបានហាមប្រាម ប្រើប្រាស់ផលិតផលរបស់ Huawei ក្នុងហេតុផល មិនពិតប្រាកដ។
សារព័ត៌មានខាងលើបានផ្សាយថា ករណីប្តឹងផ្តល់របស់ Huawei ជុំវិញ ការបំផ្លាញ បុគ្គល ឬស្ថានប័ន ក្រុមហ៊ុន ដោយលុបចោល ឬបណ្តេញចេញ ដោយមិនឆ្លង ការកាត់ទោស បង្ហាញពីភស្តុតាងជាក់ស្តែង ។
មេធាវីរបស់ អគ្គនាយកហិរញ្ញវត្ថុ Huawei បានលើកឡើងថា នៅក្នុងពាក្យបណ្តឹង ប្តឹងរដ្ឋាភិបាលកាណាដា និងកម្លាំងប៉ូលិស បានចាប់ឃុំខ្លួនលោកស្រី ឆែកឆេរ និងសួរចំឡើយក្នុងរយៈពេល៣ម៉ោង ជាការបំពាន់សិទ្ធិបុគ្គលយ៉ាងធ្ងន់ ៕
)
