សារព័ត៌មាន នគរវត្ត តែងតែនាំមុខគេជានិច្ច
ប្រទេសក្នុងតំបន់ និងជុំវិញពិភពលោកបង្ហាញពីក្តីបារម្ភយ៉ាងខ្លាំង ក្រោយអាមេរិក និងរុស្ស៊ីបានសម្រេចដកខ្លួនចេញពីសន្ធិសញ្ញាអាវុធ មីស៊ីលបរមាណូរយៈចម្ងាយមធ្យម ដែល បានអនុវត្តតាំង ពីឆ្នាំ១៩៨៨ មកទល់ពេលនេះ ។
ការដកខ្លួននោះនឹងជំរុញឲ្យពិភពលោកធ្លាក់ក្នុងដំណាក់កាលប្រកួតប្រជែងអាវុធសារជាថ្មី ដូចកាលពីសម័យសង្គ្រាមត្រជាក់ ។ ក្រោយពេលអាមេរិកបានប្រកាសថា នឹងដកខ្លួនចេញពីសន្ធិសញ្ញាអាវុធបរមាណូ INF ពេលនេះ រុស្ស៊ីបានប្រកាសដកខ្លួនជាផ្លូវការ ដោយសារតែអាមេរិកបានបំពានសន្ធិសញ្ញានេះ ។
វិមានប្រធានាធិបតីរុស្ស៊ី Kremlin បានប្រកាសថា ដោយការបំពាន់របស់អាមេរិក ប្រធានាធិបតីពូទីន បានសម្រេចចុះហត្ថលេខាដករុស្ស៊ីចេញពីសន្ធីសញ្ញា អាវុធបរមាណូរយៈចម្ងាយមធ្យម INF ដែលជាកិច្ចព្រមព្រៀងបានបង្កើនឡើង ក្នុងសម័យសង្គ្រាមត្រជាក់។
លោកពូទីនបានចេញបញ្ជា ឲ្យក្រសួងការបរទេស ចេញសេចក្តីប្រកាស ស្តីពីការដកខ្លួនរបស់រុស្ស៊ីចេញពី INF។ រដ្ឋាភិបាលទីក្រុងមូស្កូបានលើកឡើងថា អាមេរិក បានប្រើប្រាស់មីស៊ីលរយៈចម្ងាយមធ្យម ដែលបានហាមប្រាមនៅក្នុង INF ។ លោក ពូទីន បានលើកឡើងទៀតថា សន្ធិសញ្ញា INF នឹងត្រូវបានអនុវត្តឡើងវិញ ប្រសិនបើទីក្រុងវ៉ាស៊ីនតោន លុបចោលរាល់ការបំពានច្បាប់របស់ខ្លួនទៅលើ INF ។
កាលពីថ្ងៃទី២០ ខែតុលា ឆ្នាំ២០១៨ ប្រធានាធិបតីអាមេរិក ដូណាល់ ត្រាំបានប្រកាសដកខ្លួនចេញពីសន្ធិសញ្ញា INF ដែលបានចុះហត្ថលេខាកាលពីសម័យសង្គ្រាមត្រជាក់ នាឆ្នាំ១៩៨៧ ដោយអតីតប្រធានាធិបតី Ronald Reagan និងមេដឹកនំាសហភាពស៊ូវៀត Mikhail Gorbachev ហើយមានប្រសិទ្ធភាព នៅឆ្នាំ១៩៨៨៕
