សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងសណ្តាប់ធ្នាប់សាលាខណ្ឌដូនពេញបានធ្វើការរៀបចំសណ្តាប់ធ្នាប់រួច បានចុះធ្វើអនាម័យរើសសំរាមតាមមាត់ច្រាំងទន្លេ និងបាញ់ទឹកសំអាតនៅចំណុចខាងត្បូងព្រះអង្គដងកើ ស្ថិតកសង្កាត់ជ័យជំនះ ខណ្ឌដូនពេញ ។
លោកគឹម វុត្ថា បានដឹកនាំកម្លាំងសណ្តាប់ធ្នាប់ខណ្ឌបានចុះរើសសំរាមនៅច្រាំងមាត់ទន្លេដែលប្រជាពលរដ្ឋមួយចំនួនខ្វះការទទួលខុសបានយកកាកសំណល់ទៅបោះចោលគ្មានសណ្តាប់ធ្នាប់។ ជាមួយគ្នានោះដែរ អាជ្ញាធរបានបាញ់ទឹកលាងសំអាតច្រាំងទន្លេដែលជនអគតិមួយចំនួនតូចបានបន្ទោបង់ពាសវាសពាសកាលចាប់ពីវេទការអុំទូករហូតដល់របងសាលមហោស្របចតុមុខ។
លោកគឹម វុត្ថា ប្រធានសណ្តាប់ធ្នាប់ខណ្ឌដូនពេញ បានបញ្ជាក់ថា កន្លងមកលោកសុខ ពេញវុធ អភិបាលខណ្ឌដូនពេញ បានដាក់វិធានការដល់សង្កាត់ទាំង១១ ត្រូវតែបន្តការផាកពិន័យដល់ជនណាដែលបោះចោលសំរាមតាមផ្លូវសាធារណៈ និងយកផ្លូវសាធារណៈដាក់តាំងទំនិញលក់ដែលបង្កឲ្យមានការកកស្ទះចរាចរណ៍ហើយបញ្ហាសំរាមត្រូវតែអនុវត្តជាប្រចាំ។
បន្ថែមទៀតលោកគឹម វុត្ថា បានសំណូមពរដល់ប្រជាពលរដ្ឋដែលធ្វើដំណើរកម្សាន្តតាមមាត់ទន្លេក៏ដូចនៅសួនច្បាររមណីយដ្ឋាននានា មេត្តាកុំបោះសំរាមចោលលើផ្លូវសាធារណៈ ហើយកុំបន្ទោបង់តាមច្រាំងទន្លេ ។ បើមិនដូច្នេះទេ នឹងទទួលការផាកពិន័យដោយមិនអាចលើកលែងបានឡើយ។ លោកគឹម វុត្ថា រំលឹកថា «រមណីដ្ឋានស្អាត ទីក្រុងស្អាត សេវាកម្មល្អ» «បរិស្ថានល្អនាំមកនូវសុខុមាលភាព និងផាសុកភាព»៕ ជ្រោយពេជ្រ
