សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់ បានធ្វើសកម្មភាពឆក់កាបូបស្ពាយពីស្រ្តីម្នាក់ ខណៈដែរប្តីកំពុងតែជិះម៉ូតូដឹកចេញពីកន្លែងធ្វើការបានសម្រេច ហើយជិះគេចខ្លួនដោយសុវត្ថិភាពមិនរំខានដល់នគរបាលប៉ុស្តិ៍ទឹកល្អក់ទី២ ខណ្ឌទួលគោក ។
ហេតុការណ៍ឆក់កាបូបខាងលើនេះ បានកើតឡើងកាលពីវេលាម៉ោង១០យប់ថ្ងៃអង្គារ ៧កើត ខែផល្គុន ឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃទី១២ ខែមីនា ឆ្នាំ២០១៩ ត្រង់ចំណុចក្បែរមន្ទីរពេទ្យព្រះកុសុមៈ តាមបណ្ដោយផ្លូវលេខ១៥៦ កែងនិងផ្លូវលេខ២៦៥ ស្ថិតក្នុងសង្កាត់ទឹកល្អក់ទី២ ខណ្ឌទួលគោក ។
តាមសម្តីបុរសជាប្តីជនរងគ្រោះ បានឲ្យដឹងថា នៅមុនពេលកើតហេតុ គាត់និងប្រពន្ធបានជិះម៉ូតូមួយគ្រឿងម៉ាក ស៊ុយហ្ស៊ីយគីស្មាក់រេវ៉ូ ពណ៌ក្រហម ពាក់ស្លាកលេខ ភ្នំពេញ1BZ-5669 ចេញពីកន្លែងធ្វើការនៅម្តុំខាងក្រោយព្រះបរមរាជវាំង បំណងត្រលប់ទៅផ្ទះវិញនៅម្តុំទឹកថ្លា ដោយធ្វើដំណើរតាមបណ្ដោយផ្លូវលេខ១៥៦ពីកើតទៅលិច ។ លុះមកដល់ចំណុចកើតហេតុ ក៏មានរថយន្តកុងតឺន័រមួយគ្រឿង បានបើកបត់ឆ្លងផ្លូវនៅខាងមុខ ខណៈនោះគាត់ក៏បានបន្ថយល្បឿនម៉ូតូបម្រុងឈប់ ស្រាប់តែលេចមុខជនសង្ស័យ២នាក់ ជិះម៉ូតូមួយគ្រឿងម៉ាក MSX មិនចាំស្លាកលេខ ជិះមកពីក្រោយម៉ូតូរបស់គាត់ រួចធ្វើសកម្មភាពឆក់កាបូបពីប្រពន្ធ ដែលកាន់ក្តោបដាក់ពីមុខបានសម្រេច បណ្តាលឲ្យប្រពន្ធគាត់ធ្លាក់ពីលើម៉ូតូរងរបួសស្រាល ។ ចំណែកជនសង្ស័យបានបន្ថែមល្បឿន ជិះរត់គេចខ្លួនបាត់ស្រមោល ។ សម្ភារបាត់បង់នៅក្នុងកាបូបរបស់ជនរងគ្រោះនោះមាន៖ លុយដុល្លារជិត៥០ដុល្លារ អត្តសញ្ញាណប័ណ្ណមួយសន្លឹក និងសម្ភារៈមួយចំនួនទៀត ។
ក្រោយកើតហេតុជនរងគ្រោះទាំងពីរប្តីប្រពន្ធ បានទៅដាក់ពាក្យបន្តឹងនៅប៉ុស្តិ៍នគរបាលរដ្ឋទឹកល្អក់ទី២ ដើម្បីឲ្យសមត្ថកិច្ចជួយអន្តរាគមន៍ស្រាវជ្រាវតាមចាប់ជនសង្ស័យទាំងនោះ យកមកផ្តន្ទាទោសតាមច្បាប់ ៕ ស តារា
