ស្លាប់ភ្លាមៗ ករណីគ្រោះថ្នាក់ចរាចរណ៍ នៅលើកំណាត់ផ្លូវថ្នល់ជាតិ៥៥

ខេត្តពោធិ៍សាត់៖ បុរសម្នាក់បានបាត់បង់ជីវិតយ៉ាងអាណោចអាធ័ម ក្នុងហេតុការណ៍គ្រោះថ្នាក់ចរាចរណ៍ដ៍រន្ធត់មួយ រវាងអ្នកបើកបររថយន្តកែច្នៃ នឹងអ្នកជិះម៉ូតូ នៅគ្រាដែលកំពុងធ្វើដំណើរច្រាស់ទិសគ្នា។

ហេតុការណ៍គ្រោះថ្នាក់ចរាចរណ៍បណ្ដាលឲ្យស្លាប់មនុស្សម្នាក់ខាងលើ បានកើតឡើងនៅវេលាម៉ោង៧ និង០០នាទី យប់ ថ្ងៃព្រហស្បតិ៍ ៩កើត ខែផល្លុន ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី១៤ ខែមីនា ឆ្នាំ២០១៩ នៅលើកំណាត់ផ្លូវថ្នល់ជាតិ៥៥ ត្រង់ចន្លោះបង្គោលគីឡូម៉ែត្រលេខ ៤៤.៤៥ ស្ថិតក្នុងភូមិអង្រ្គង ឃុំសំរោង ស្រុកភ្នំក្រវាញ ខេត្តពោធិ៍សាត់។

យោងតាមរបាយការណ៍ផ្នែកសណ្ដាប់ធ្នាប់នៃអធិការដ្ឋាននគរបាលស្រុកភ្នំក្រវាញបានឲ្យដឹងថា ជនរងគ្រោះ(ស្លាប់) ឈ្មោះ ជា ផល្លា ភេទប្រុស អាយុ ៣៦ឆ្នាំ ជនជាតិខ្មែរ មានទីលំនៅភូមិអង់ត្បូង ឃុំតាពូង ស្រុកថ្មគោល ខេត្តបាត់ដំបង បច្ចុប្បន្នរស់ស្នាក់នៅ ភូមិ.ឃុំកើតហេតុខាងលើ (កម្មករសំណង់) ធ្វើដំណើរដោយម៉ូតូ ១គ្រឿងម៉ាក វ៉េវអាល់ហ្វា សេ១១០ សេរីឆ្នាំ២០១៥ ពណ៏ខ្មៅ ពាក់ស្លាកលេខ កំពង់ចាម 1F 2941 ធ្វើដំណើរក្នុងទិសដៅពីលិចឆ្ពោះទៅទិសខាងកើត លុះដល់ចំណុចកើតហេតុបានជែងគោយន្តកន្រ្តៃ ក៏ត្រូវរថយន្តកែច្នៃ ១គ្រឿងមកពីមុខបុកពេញទំហឹងតែម្ដង បណ្ដាលឲ្យដួលបោកផ្ទប់ទៅថ្នល់ស្លាប់មួយរំពេចបែបនេះ ។

ប្រភពរាយបាយការណ៍បន្តទៀតថា ក្រោយជួមហេតុការណ៍ អ្នកបើកបររថយន្តកែច្នៃបានគេចបាត់ កំពុងមមាញឹកក្នុងការស្រាវជ្រាវ ដើម្បីយកអ្នកបើកបរបង្កមកបន្តនីតិវិធី ជនរងគ្រោះស្លាប់អត់មានពាក់មួកសុវត្ថិភាព បានធ្វើកំណត់ហេតុប្រគល់ជូនក្រុមគ្រួសារសាច់ញាតិ ដើម្បីយកទៅចាត់ចែងធ្វើបុណ្យតាមប្រពៃណី ៕ ប៉ឹម ពិន