សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមវិដេអូពីកាមេរ៉ាសុវត្ថិភាព របស់ហាងលក់ទូរស័ព្ទយីហោ “គ្នាយើង” បានប្តឹងទៅសមត្ថកិច្ចនគរបាលខណ្ឌចំការមន ដើម្បីជួយធ្វើអន្តរាគមន៍ភ្លាមៗ បន្ទាប់ពីក្មេងប្រុសម្នាក់ បានធ្វើសកម្មភាពលួច យកទូរស័ព្ទដៃស៊េរីទំនើបពេញមួយកេស ដោយសុវត្ថិភាព ខណៈម្ចាស់ហាងមានការធ្វេរប្រហែសបានយកទូរស័ព្ទរៀបចំដាក់ចូលក្នុងកេសនោះ ហើយលើកយកមកទុកមុខហាង គាប់ជួនត្រូវបានក្មេងប្រុសម្នាក់ ឆ្លៀតឱកាសលួចលើកយកទៅបាត់ ។
ករណីខាងលើនេះ កើតឡើងនៅវេលាម៉ោង៧និង៣៨នាទីយប់ ថ្ងៃអាទិត្យ ១២កើត ខែផល្គុន ឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃទី១៧ ខែមីនា ឆ្នាំ២០១៩ នៅចំណុចមុខហាងលក់ទូរស័ព្ទយីហោ “គ្នាយើង” នៅតាមបណ្ដោយផ្លូវលេខ២៩៤ កែងផ្លូវផ្សារកាប់គោ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
យោងតាមសម្ដីយុវជនឈ្មោះ ទីន ជាជាងជួសជុលទូរស័ព្ទក្នុងហាងខាងលើ បានឲ្យសមត្ថកិច្ចដឹងថា មុនពេលកើតហេតុ រូបគាត់ជាអ្នករៀបចំទូរស័ព្ទទាំងនោះ ដាក់ចូលកេស រួចលើកកេសនោះយកមកទុកលើគ្រែមុខហាង ដូចសព្វដង ហើយរូបគាត់បានដើរចូលទៅក្នុងហាងវិញ ដើម្បីរៀបចំប្រអប់ទូរស័ព្ទ និងទូរស័ព្ទផ្សេងទៀត ដោយមិនចាប់អារម្មណ៍ថា មានចោរមកធ្វើសកម្មភាពលួចនោះទេ ។ បន្ទាប់រៀបចំហើយ ដល់ម៉ោងបិទហាង ទើបដឹងថា បាត់កេសទូរស័ព្ទនោះ ទើបប្រញាប់ឆែកកាមេរ៉ាសុវត្ថិភាពមើលទើបឃើញសកម្មភាពក្មេងប្រុសខាងលើ ជាអ្នកលួចយកទៅ ។
ដោយឡែកយោងតាមហ្វេសប៊ុកម្ចាស់ហាងទូរស័ព្ទខាងលើ ឈ្មោះ Steve Calito បានអោយដឹងថា បើឃើញមានអ្នកយកលក់ទូរសព្ទ័ដូចជា IPhone X new Falcon, Hauwie T3 10, Hauwei Y5, Hauwei Prime Y6, Hauwei Prime Y7 Pro Nova, Samsung A5 2017 និង Iwatch series 3 box black, Camfone Hiya ….. សូមជួយទាក់ទងមកផង 070923681 ។
ក្រោយកើតហេតុ យុវជនជាងទូរស័ព្ទខាងលើ បញ្ជាក់ថា ទូរស័ព្ទ និង Iwatch ក្នុងកេសនោះ គិតជាទឹកប្រាប់សរុបចំនួន 3498$ ។ ហើយម្ចាស់ហាង(ជនរងគ្រោះ) សូមអំពាវនាវដល់សមត្ថកិច្ចគ្រប់ជាន់ថ្នាក់ បើសិនឃើញជនសង្ស័យដែលមានភិនភាគដូចក្នុងរូបនេះ សូមជួយធ្វើអន្តរាគមន៍ផង ៕ស រស្មី
