បុរសម្នាក់ស្លាប់ និងស្រ្ដីម្នាក់រងរបួសស្រាល ព្រមទាំងខូចខាតយានយន្ត២គ្រឿង

ខេត្តកំពង់ធំ៖ គ្រោះថ្នាក់ចរាចរណ៍ រថយន្ត បុកម៉ូតូ ក្នុងទិសដៅផ្ទុយគ្នា បណ្តាលឲ្យបុរសម្នាក់ស្លាប់ និងស្រ្ដីម្នាក់រងរបួសស្រាលព្រមទាំងខូចខាតរថយន្ត០១គ្រឿងតិចតួច និងម៉ូតូ០១គ្រឿងយ៉ាងដំណំ ។

ហេតុការណ៍នេះបានកើតឡើងកាលពីវេលាម៉ោង៥ និង៣៥នាទីព្រឹក ថ្ងៃអង្គារ ១៤កើត ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៩ ខែមីនា ឆ្នាំ២០១៩ លើផ្លូវកំណាត់ផ្លូវជាតិលេខ៦ ចំណុចលូសាលាសន្ទុក ភូមិសាលាសន្ទុក ឃុំកកោះ ស្រុកសន្ទុក ខេត្តកំពង់ធំ ។

សមត្ថកិច្ចបានឲ្យដឹងថា រថយន្តម៉ាកហ៊ីយ៉ានដាយ ពណ៌ស ស្លាកលេខ ភ្នំពេញ 3E.6028 បើកបទិសដៅពីជើងទៅត្បូង ហើយបត់ឆ្វេង អ្នកបើកបរមិនស្គាល់អត្តសញ្ញាណ គេចខ្លួន ។ ម៉ូតូម៉ាកហុងដា ឌ្រីម C125 ពណ៌ខ្មៅ ស្លាកលេខកំពង់ចាម 1Q.6452 បើកបរផ្លូវត្រង់ទិសដៅពីត្បូងទៅជើង ដោយឈ្មោះ ផ្លិត រ៉ា ភេទប្រុស អាយុ៥៤ឆ្នាំ កសិករ នៅភូមិបល្ល័ង្ក ឃុំបល្ល័ង្ក ស្រុកបារាយណ៍ ខេត្តកំពង់ធំ ស្លាប់នៅកន្លែងកើតហេតុ ពាក់មួកសុវត្ថិភាព ។ អ្នករួមដំណើរឈ្មោះ សុំ សុង អាយុ៥៥ឆ្នាំ ប្រពន្ធអ្នកបើកបរម៉ូតូ កសិករ របួសស្រាល ពាក់មួកសុវត្ថិភាព ។

ក្រោយកើតហេតុរថយន្តបង្ក បានបើកគេចចេញពីកន្លែងកយកទៅចតចោលនៅកសិដ្ឋានចិញ្ចឹមជ្រូក នៅជើងភ្នំពែនក្នុង ភូមិអូរកោះគគី ឃុំជ្រាប់ ស្រុកសន្ទុក ហើយអ្នកបើកបររថយន្តរត់គេចខ្លួនបាត់ ។

មូលហេតុ បង្កឡើងអ្នកបើកបររថយន្ត បើកបរបត់ឆ្វេងខ្ជីខ្ជារខ្វះការប្រុងប្រយ័ត្ន ។ ក្រោយកើតហេតុ សមត្ថកិច្ច ចុះវាស់វែងធ្វើកំណត់ហេតុ និងប្រគល់ជូនក្រុមគ្រួសារចាត់ចែងធ្វើបុណ្យតាមប្រពីណៃ៕ ប៊ុនរិទ្ធី